Тимур Кападзе: "Сурхон"дан бунақа ўйин кутмагандим!

Суперлига 1-туридан ўрин олган "Сурхон" - "Олимпик" учрашуви бўлиб ўтди ва унда жамоалар 0:0 ҳисобидаги нурсиз дурангга имзо чекди. 

Ўйиндан сўнг мураббийлар матбуот анжуманида иштирок этди. Марҳамат, олимпиадачилар устозининг фикрлари билан танишиб чиқинг. 

- Ассалому алейкум. Барчани янги мавсум бошлангани билан табриклайман. Ўйинга келадиган бўлсам, қизиқарли ва курашларга бой учрашув гувоҳи бўлдик. Албатта, биринчи ўйин бўлгани учун йигитларда хаяжон сезилди ва бир қатор хатоларга йўл қўйдик. Умуман олганда, майдонда ўйнаётган футболчилар учун фойдали баҳс бўлди. Сабаби, Суперлиганинг ҳавоси бошқа. "Сурхон" ҳам бугунги учрашувга яхши тайёргарлик кўрган экан. Рақиб узатмалар орқали ўйнади ва бу курашларга олиб келди.

- Бизга легионерларнинг кераги йўқ. Ўзимизнинг йигитларни тарбиялаяпмиз. Мақсадимиз шу каби ўйинлар билан уларни яна ҳам кучлироқ қилиш. Шунингдек, Олимпиада йўлланмасини қўлга киритиш ва Осиё чемпионатида совринли ўринлар учун курашишни ният қилганмиз. Шу сабабли, бизга легионер керак эмас.

- Ҳаяжон ва бошқа омиллар бизга ҳалақит берди. Бундан ташқари, "Сурхон" ҳам ажойиб кайфият билан майдонга тушди. Бироқ биз ҳаракатдан тўхтамаймиз ва ўйиндан-ўйинга кучайиб борамиз.

- Жисмоний ҳолатимиз оптимал эмас, аммо тайёргарлик кўрдик. Бу камчилигимизни секин-асталик билан бартараф этамиз. Умуман олганда, иккинчи бўлимнинг охирида бироз чарчаб қолдик, лекин унгача ҳар тарафлама яхши эдик. "Сурхон"ни ҳам алоҳида таъкидлаб ўтиш лозим. Уларнинг бош мураббийи клубда интенсивликни оширган. Бугунги ўйинда испан мутахасиснинг жамоасидан комбинацион ўйин кутаётгандим. Бироқ улар узатмалар орқали кўп ўйнади.

- Ҳар бир чизиқда хатолар ва ютуқлар кўринди. Шогирдларим бундан ҳам яхши тўп тепа олишига ишонаман. Дарвозабонимиз бурчак зарбалари пайтида иккита сейв амалга оширгани учун  беллашувнинг энг яхши ўйинчини бўлди. Бироқ бошқа чизиқларда ҳам ажойиб ўйин намойиш этган футболчиларимиз бор эди. Бу ўзгаларнинг танлови ва бунга ортиқча эътибор бермайман.