Тўлашбой Дониёров: "Карьерамда бир марта нокдаунга тушганман"

2000 йиллар бошида ҳаваскор боксда терма жамоа таркибида дунё рингларида юртимиз шарафини ҳимоя қилган моҳир боксчиларимиз билан танишмисиз?

Улардан бири, қатор халқаро турнирлар ғолиби, Осиё чемпионатларининг кўп карра совриндори, жаҳон чемпионатлари ва Олимпиада ўйинлари иштирокчиси, “Ўзбекистон Республикасида хизмат кўрсатган спортчи”, “Ўзбекистон ифтихори” кўкрак нишони соҳиби Тўлашбой Дониёров.

www.sports.uz нашри боксчи билан суҳбатни эътиборингизга ҳавола этади.

- Тўлашбой ака, узоқ йиллар терма жамоанинг асосий таркибида бўлгансиз. Бунга сабаб нима? Ёки рақобат у қадар юқори бўлмаганми?

- Ўзбекистонда ҳаваскор боксда ҳар доим кучли рақобат бўлган ва бундан кейин ҳам бўлади. Мен -51 кг вазн тоифасида фаолият кўрсатганман. Мени вазнимда Дилшод Йўлдошев, Рустам Рустамов, Равкат Эралиев каби халқаро тоифадаги ва Ўзбекистон Республикасида хизмат кўрсатган спортчи мақомига лойиқ кўрилган ўта кучли боксчилар бўлган. Лекин одам ўз устида тинимсиз ишлаши керак. Меҳнатдан ҳеч қачон қочмаганман. Фақатгина машаққатли меҳнатим эвазига узоқ йиллар терма жамоадаги ўрнимни сақлаб турганман.

- Боксда техник жиҳатдан кўп янгиликлар ва ўзгаришлар юз берди. 2000 йиллар бошидаги билан ҳозирги кундаги боксимиз ўртасида қандай фарқлар бор?

- Ўтган 15-20 йил ичида ўзбек боксида у қадар катта ўзгартишлар бўлгани йук. Техник жиҳатдан киритилган элементар янгиликларни ҳисобга олмаганда, катта фарқ сезилмайди. Таъкидлаш керак, жаҳонда ҳаваскор бокс шиддат билан ривожланиб бормоқда, рақобат борган сари жиддий тус оляпти. Лекин Ўзбекистонда бокс мактаби жуда кучли, у кеча пайдо бўлиб қолгани йўқ. Унинг илдизи ва пойдевори мустаҳкам, бу даражага етишда ҳар бир авлод вакилларининг ҳиссаси бор. Умид қиламанки, боксчиларимиз узоқ йиллар дунё рингларида етакчиликни қўлдан беришмайди.

- Энг эсда қоларли жангларингиз қандай мусобақада ва қайси боксчиларга қарши кечган?

- Энг эсда қоларли жангларим, шубҳасиз 2004 йили Афина олимпиадасида бўлган. Саралаш босқичидаги биринчи беллашувимда филиппинлик азалий рақибим Виолито Пайлага қарши рингга чиққанман. Бундан аввал, Осиё чемпионати ва Осиё ўйинларида жанг қилиб, иккисида ҳам имкониятни бой берганман. Афинада эса Пайлага умуман имконият қолдирмадим, ҳатто иккинчи раундда нокдаунга ҳам учратдим ва якунда 36:26 ҳисобида зафар қучдим. Кейинги рақибим АҚШлик Рон Сайлер бўлган. Сайлер бу вазнда фаворит саналиб, олимпия чемпиони бўлиши кутилаётган эди. Бироқ, мен бор маҳоратимни намойиш эта олдим ва жуда катта фарқ билан 45:22 натижасига кўра Ронни мусобақадан чиқариб юбордим. Ёрқин жанг бўлганди ўшанда. Аренага йиғилган мухлислар ўринларидан туриб олқишлашганда, кўз ёшларимни яшира олмаганман.

- Баъзида боксчилар кучли зарба ўтказиб нокдаунга учрагач, мувозанатини тиклаб, хатто жангни ғалаба билан якунлашади. Сизда шундай тўқнашувлар бўлганми?

- Ҳа, шундай ҳолат менда бўлган. 2001 йили Туркияда “А” классдаги боксчилар ўртасидаги мусобақанинг ярим финалида македониялик Вали Мўмин исмли боксчи билан учрашганман. Тан оламан, кўп рақибларимнинг исми ҳозирга қадар ёдимдан кўтарилган, Валини эса ҳеч қачон эсимдан чиқармасам керак. Раунд якунида юзага келган зарбалар алмашинуви вақтида у мени жигаримга шу қадар кучли зарба бердики, нафасим бир муддат тўхтаб, қийин вазиятга тушиб қолдим. Ўшанда мени гонг қутқарган. Танаффус вақтида мураббийим Лочин Қўчқоров бир дақиқа ичида мени ўзимга келтириб, моҳирона тактика юритиши натижада очколар ҳисобида ғалаба қозондим. Ўшанда карерамда учраган ягона нокдаун бўлган. Финалда эса украиналик боксчини 13:0 ҳисобида мағлуб этиб, халқаро тоифадаги спорт устаси нормативини бажарганман.

- Жаҳон чемпионатида ҳам, олимпиада ўйинларида ҳам иштирок этгансиз. Уларга тайёрланиш жараёни бошқа мусобақаларга тайёрланишдан нимаси билан фарқ қилади?

- Ҳақиқатдан ҳам, жаҳон чемпионати ва олимпиада ўйинларига тайёргарлик жараёни бошқалариникидан тубдан фарқ қилади. Муҳим жиҳати шундаки, Республика чемпионатидан тортиб, барча турдаги халқаро мусобақалар, қитъа чемпионатлари, Осиё ўйинлари, хаттоки жаҳон чемпионати ҳам пировардида олимпия ўйинларига тайёргарлик вазифасини ўтайди. Боиси, спорт оламида эришиш мумкин бўлган энг юқори чўққи, шубҳасиз, олимпиада ўйинларининг олтин медали ҳисобланади.

- Бокс мухлисларига тилакларингиз.

- Барча юртдошларимизни муборак Рамазон ойи билан табриклайман. Бокс федерацияси номидан, барча боксчилар, қолаверса, ўзимнинг номимдан оилавий ҳотиржамлик тилайман. Боксчиларимиз ҳали узоқ вақт давомида энг нуфузли мусобақаларда юқори чўққиларни забт этиб, мухлислар ишончини оқлашига тилакдошман.

Фазлиддин Ҳусниддинов суҳбатлашди.