“Топ-лига”нинг энг зўр тўпурари ҳам Осиёга кетди

Италия чемпионати А Сериянинг 2024-2025 йилги мавсуми тўпурари Матео Ретеги фаолиятини Европадан ташқарида давом эттирадиган бўлди.

Саудия Арабистонининг “Ал-Қодисия” клуби ижтимоий тармоқдаги расмий саҳифаси орқали “Аталанта” форвардини трансфер қилганини билдирди.

26 ёшли футболчи Аргентинада туғилган, лекин Италия паспортига эга ва халқаро майдонда италияликлар шарафини ҳимоя қилиб келмоқда.

Ретеги “Ривер Плейт” ва “Бока Хуниорс” клублари тарбияланувчиси ҳисобланади. Аргентинада “Эстудиантес”, “Тальерес”, “Тигре” каби жамоаларда ҳам ўйнаган.

Матео Европадаги фаолиятини 2023 йили “Женоа”дан бошлаган. Ўтган йили ёзда “Аталанта”га кўчиб ўтган ҳужумчи А Серияда 36 та учрашувда 25 та тўп киритиб, чемпионатнинг энг зўр тўпурари бўлди.

“Ал-Қодисия” маҳоратли ҳужумчи билан 2028 йилнинг ярмигача давом этадиган шартнома тузганини маълум қилди.

Ретеги Италия терма жамоасида йигирмата учрашувда майдонга тушиб, рақиблар дарвозасини олти марта ишғол қилган.