«Тоттенхэм» Мармушни сотиб олиш мажбурияти билан ижарага олди

«Тоттенҳэм» «Манчестер Сити» ҳужумчиси Омар Мармушни ижара асосида ўз сафига қўшиб олди. Клуб шартномага кўра футболчини кейинчалик 60 миллион фунт эвазига тўлиқ сотиб олиш мажбуриятини ҳам ўз зиммасига олган. Бу сумма 50 миллион фунтлик асосий тўлов ва 10 миллион фунтлик бонуслардан иборат.

Лондон клуби расман эълон қилганига кўра, Омар Мармуш аввал ижара асосида жамоага қўшилади. Шундан сўнг у тўлиқ тарзда «Тоттенҳэм» футболчисига айланиши кутилмоқда.

«Sky Sports News» манбаларига кўра, шартнома доирасида белгиланган 60 миллион фунтлик мажбурий сотиб олиш банди аниқ келишилган. Унга мувофиқ, «Тоттенҳэм» 50 миллион фунтни кафолатланган тарзда тўлайди, яна 10 миллион фунт эса қўшимча шартларга боғлиқ равишда берилади.

Маълумот учун, Омар Мармушни 2025 йил январь ойида «Айнтрахт Франкфурт» «Манчестер Сити»га сотган эди. Олдинги хабарлардан фарқли ўлароқ, немис клуби бу келишувга қайта сотишдан улуш олиш бандини киритмаган.

«Айнтрахт Франкфурт» ўша пайтда ўзлари истаган кафолатланган тўловни, шунингдек, белгиланган бонусларни қўлга киритган. Шартнома бўйича тўловлар қисқа муддатда амалга оширилгани сабабли, «Манчестер Сити»нинг франкфуртликлар олдидаги барча молиявий мажбуриятлари тўлиқ бажарилган.

Шу тариқа Мармуш «Манчестер Сити»даги собиқ жамоадоши Савио йўлини қўллаб, Роберто Де Зерби қўл остидаги жамоага қўшилмоқда. Бразилиялик ярим ҳимоячи сейшанба куни 85 миллион фунт эвазига «Тоттенҳэм»га ўтган эди.