ЦСКА Файзуллаевнинг кетишига рухсат берадими?

Тез орада Франция пойтахти Париж шаҳрида бошланадиган ёзги Олимпия ўйинлари ўзбекистонлик спорт ишқибозлари учун алоҳида аҳамият касб ўтади.

Сабаби – ўзбек футболчилари илк бор спорт оламининг энг нуфузли мусобақасида иштирок этиш ҳуқуқини қўлга киритган. Олимпия ўйинлари футболчилар учун ўз иқтидорини намойиш қилиш имконини берадиган, кўплаб скаутлар, мураббийлар, мутахассислар кузатадиган йирик мусобақа ва кўрик майдони вазифасини ўтайди.

Тимур Копадзе бошқарувидаги Ўзбекистон U-23 терма жамоаси Қатарда ўтказилган Осиё кубогида иккинчи ўринни эгаллаб, ўзбек футболи тарихида илк бор Олимпиадада қатнашадиган бўлди.

Парижга борадиганлар рўйхатига Аббосбек Файзуллаев ҳам киритилган. 20 ёшли ҳужумкор футболчимиз Қатардаги Осиё кубогининг энг муҳим ўйинларида иштирок этиб, терма жамоанинг умумий муваффақиятига катта ҳичча қўшганди. Бироқ, ўша пайт Россия Премьер-лигасининг муҳим учрашувларида ЦСКАга ёрдам бера олмагани “армиячилар”нинг мухлисларига ёқмаган эди.

Ҳозир ҳам, Париж Олимпиадаси Россия Премьер-лигаси бошланган даврга тўғри келиб қоладиган бўлди. Кўпчиликни ЦСКА раҳбарияти жамоадаги муҳим фигуралардан ҳисобланган Аббосбек Файзуллаевни Олимпия ўйинларига боришига қандай муносабатда бўлиши қизиқтиради.

ЦСКАнинг янги бош мураббийи Марко Николич ўзбекистонлик футболчи учун ўта муҳим ҳисобланган вазиятга ўз муносабатини билдирди.

Аббосбек Файзуллаев Олимпиадага борадими? Олимпия ўйинлари футболчи ҳаётида бир мартагина бўлиши мумкин. Мана шу менинг жавобим.  

Ҳали олдинда икки ҳафта вақт бор ва энг аввало, Аббос ўзини қандай ҳис қилаётганига қараймиз. Лекин ҳаётда бир маротаба бўладиган воқеага отланаётган одамни қандай қилиб тўхтатиш мумкин?,  – деди Марко Николич.

Париж Олимпиадаси 26 июлдан 11 августга қадар бўлиб ўтади. Футболчиларимиз мусобақадаги иштирокини  24 июль куни Испания олимпия терма жамоасига қарши ўйиндан бошлайли. Тимур Копадзе шогирдлари 27 июлда Миср ва 30 июль куни Доминикан Республикаси терма жамоалари билан куч синашади.

Аббосбек Файзуллаев 23 ёшгача бўлган футболчилардан иборат терма жамоада асосий фигуралардан ҳисобланади. Легионеримиз ушбу жамоа сафида 14 та баҳсда қатнашиб, рақиблар дарвозасини тўрт маротаба ишғол қилган.

ЦСКА клуби Файзуллаевни ўтган йили августда “Пахтакор”дан олиб келганди. Тошкент клубига бу трансфер 500 минг еврога тушган.

Файзуллаев Россия Премьер-лигаси ва мамлакат кубогида жами 32 маротаба майдонга тушиб, ўз ҳисобига 5 та гол ва 14 та ассист ёздириб қўйди. Мавсум кашфиёти номига сазовор бўлган 20 ёшли легионеримизнинг трансфер суммаси 6 миллион еврога кўтарилди.

Бугунги кунда Аббосбек Файзуллаев Марказий Осиёнинг энг қимматбаҳо ўйинчиси ҳисобланади. Унга Германия, Италия ва Испания каби куули лигаларидан қизиқиш бўлаётгани ҳақида маълумотлар чиқарилган эди.

Легионерларимизни Европа Чемпионлар лигасидан чиқариб юборишмоқчи

Ўзбек футболчилари Европа Чемпионлар лигасида порлаши кутиляпти...