"Турк жамоасидан таклиф кутилмаганда бўлди, Арда Турон клубга қўшилганимдан хурсандлигини яширмади" - легионерга айланган Жаҳонгир Ўрозов билан суҳбат

“Бунёдкор” клуби тарбияланувчиси, Жаҳонгир Ўрозов бундан буён фаолиятини Туркия чемпионатида давом эттиради.

Аниқроғи, таниқли турк футболининг собиқ юлдузи Арда Турон бош мураббийлик қилаётган “Эйюспор” Ўрозов билан 5 йиллик шартнома имзолади. Ушбу клуб айни пайтда Туркия биринчи дивизионида иштирок этади.

Жаҳонгир Ўрозов Sports.uz сайтига интервью берди.

- Жаҳонгир янги клубга кўчиб ўтганингиз муносабати билан табриклайман. Бундан барча юртдошларимиз ҳам хурсанд бўлдилар. Ушбу таклиф қачон бўлганди? Турк клубига ўтишингиз жараёнлари қай тарзда юз бергани хусусида гапириб берсангиз.

- Осиё ва жаҳон чемпионатидан сўнг кўплаб мамлакатлардан таклифлар келиб тушди. Россия, Қозоғистон, Қатар клубларидан чорловлар бўлди. Бироқ музокаралар охиригача етмади. Турк жамоасидан таклиф кутилмаганда юз берди. Айтишим керакки, ушбу таклиф менга маъқул келди. Натижада мен “Эйюспор” жамоасидаман.

- Янги жамоангиздаги илк таассуротларингиз қандай ва бу ерга келгач, олдингизга қўйган мақсадингиз ҳақида ҳам тўхталсангиз.

- Жамоада мени жуда илиқ кутиб олишди. Мақсадим, бу клубда узоқ вақт қолиб кетмаслик. Ниятим Европа жамоаларидан бирида муваффақиятли тўп суриш.

- Янги жамоангизда туркиялик таниқли собиқ футболчи Арда Турон бош мураббий. У билан илк учрашувингиз қандай бўлди? Яъни, суҳбатда сиздан кўпроқ нималар ҳақида сўради?

- Суҳбатимиз унчалик узоқ бўлмади. Профессионал мураббийлиги сезилиб турибди. Жамоага қўшилганимдан хурсандлигини яширмади.

- “Эйюрспор”да қайси рақамни танладингиз ва сизга қандай шароитлар яратилди? Қолаверса, нима учун айнан 5 йиллик шартнома?!

- 44-рақамни танладим. Ҳозирча клуб базасидан жой олдим. Шароитлар аъло даражада. Бу табиий ҳол. Европада ёш футболчилар билан 5 йилдан кам бўлмаган шартномалар тузилмайди. Уларни мақсади тарбия қилиб, катта клубларга сотиш.

- Жаҳон чемпионатидан сўнг аслида ҳам легионерга айланиш режангизда бормиди ёки барчаси тўсатдан юз бердими? Шунингдек, “Бунёдкор”ни тарк этаётганингизда қандай ҳис-туйғуларни бошингиздан ўтказдингиз?

- Албатта, кетиш режамда бор эди. “Бунёдкор”ни тарк этиш эса осон бўлмади. Лекин ҳар бир футболчининг орзуси кучли чемпионатларда тўп суриш.

- Илк бор легионер сифатида Европага кетдингиз ва сиздан катта масъулият талаб қилинади. Босимни енгиб ўтиш жараёнида бу ҳолат сизга қийинчилик туғдирмайдими?

- Ёнимда менежерим бор. Ҳар доим мени қўллаб-қувватлаб туради. “Бунёдкор” клубида ишлаган Шахриёр ака ҳозирги кунда мен билан бирга ҳамкорлик қиляпти. Ўзининг маслаҳатларини ҳам аямаяпти.

- Охирги пайтларда турк клублари томонидан футболчиларимизга қизиқиш ортиб бормоқда. У ерга борганингизда ўзингиз ҳам бевосита ўйинчиларимиз талаб ошиб бораётганини сезяпсизми?

- Ҳозирги пайтда ҳар бир давлатда футбол тез ривожланяпти. Жумладан, Ўзбекистонда ҳам. Юртимизда кўплаб иқтидорли ўйинчилар етишиб чиқмоқда. Футболчиларимизга эътибор кучаётгани скаутларни Ўзбекистон чемпионатини эътибордан четда қолдирмаганидан деб биламан.

- Бундан ташқари, “Эйюспор” клубида таниқли футболчи Райан Бабел ҳам тўп сурмоқда. У билан танишиш қандай бўлди ва сизда қандай таассурот қолдиряпти?

- Бабел ўз ишининг устаси. Инсон сифатида ҳам ёшларга ўрнак бўлади. Ёшларга жуда ҳам хулқ атвори яхши эканлиги кўриниб турибди.

- Арда Турон қандай мураббий экан?

- Футбол осон ўйин эмаслигини айтиб ўтди. Майдонда ҳар доим жанговар футболни ёқтиради.

- Қолаверса, Туркиядаги бошқа ҳамюртларимиз билан ҳам кўришиш имкони бўлдими?

- Отабек ака Шукуров билан телефон орқали гаплашдим. Аммо ҳали кўришишга имкон бўлмади.

Шуҳратбек Жўраев.