"Турон" иккинчи даврага қанчалик тайёр ёхуд бош мураббий "Рубин"га қарши ўйин, ёзги йиғин ва ёшартирилган таркиб ҳақида гапирди

Суперлигада биринчи даврадан кейин ягона ғалабасиз жамоа бўлиб келаётган Яйпаннинг “Турон” клуби ёзги йиғин чоғида қатор етакчиларидан айрилди.

Жамоа йўналиши ўзгариб, асосан иқтидорли ёш футболчилар кетганларнинг ўрнига жалб қилинди.

Эндиликда “Турон” таркиби сезиларли даражада ёшартирилди. Бош мураббий Ёрқин Назаров энди қўл остидаги ўйинчилар билан вазифани бажаришга уриниб кўради. Ушбу мутахассис Sports.uz сайтига жамоасининг “Рубин”га қарши ўртоқлик учрашуви, ёзги тайёргарлиги ва таркиб ҳақида гапирди.  

"Ёзги йиғинимиз яхши ўтди, - дея гап бошлади, "Турон" бош мураббийи. - Албатта, йиғин мобайнида режа тузиб чиққандик ва ўртоқлик учрашувларини ҳам келишиб қўйгандик. Лекин кутилмаганда Россияга сафар бўлиб қоладиган бўлди. Яъни, “Рубин” жамоаси билан ўйин ташкил қилинди. Натижада “Рубин”га қарши ўртоқлик учрашуви учун режаларимизни ўзгартиришимизга тўғри келди. Қозонга бориб ўйнаган ўйинимиз ҳақида гапирадиган бўлсам, бизнинг футболчиларга бу ўйин жуда яхши мактаб бўлди. Россия премьер-лигаси жамоасига қарши ўйнаш ўзимизга ҳам қизиқ кечди. Бундай учрашувдан яхши хулосалар чиқардик. Бир сўз билан айтганда, йиғинларимиз кўнгилдагидек ўтяпти ва ўйинга яхши тайёрланяпмиз.

Мураббий сифатида қониқяпмиз. Биласиз, жамоамизни 70-80 фоиз футболчилар тарк этишди. Таркибимизга ёшларни йиғдик. Энди иккинчи даврада иқтидорли ёшлар билан ўйнаймиз.

Таркиб масаласига келсак, биринчи даврадан кейин қолган ўйинчилар биз билан бирга. Кетадиганлари кетди. Боя айтиб ўтганимдек, жамоамизни ёш футболчилар билан тўлдирдик. Истеъдодли ёшлар яхши мактаблардан қўшилишди. Эътиборлиси, улар биз хоҳлаётган нарсани тез қабул қилишяпти. Ёшлар “Насаф”, “Пахтакор” каби клубларнинг мактабларидан келишган. Шу боис бизнинг кўрсатмаларимизни тез ўзлаштиришяпти.

Осон ишни ўзи йўқ. Биринчи даврада тажрибали футболчилар бўлгани билан барибир яхши натижа бўлмади-ку. Таркибимизни иқтидорли ёшлар билан ёшартиришга қарор қилдик ва албатта улар билан осон бўлмайди. Лекин қўйилган вазифани уддалашга охиригача ҳаракат қиламиз.

Куни кеча Яйпанда яхши тадбир ўтказилди. “Турон” мухлислари билан кўришдик, гаплашдик. Уларни футболни яхши кўришлари билиниб турибди. Худо хоҳласа, ишқибозларни ўйинимиз билан стадионга қайтаришга ҳаракат қиламиз", - дейди Назаров.

Шуҳратбек Жўраев.