U-20 ЖЧ. "Ўлим гуруҳи"да пешқадамга айланган Италия. Ўзбекистонни осон рақиб кутмаяпти! Англияни қувиб ўтган Уругвай (Барча гуруҳлардаги ҳолат)

Аргентинада бўлиб ўтаётган U-20 Жаҳон чемпионатининг 1-тур учрашувлари ўз ниҳоясига етди. Унда ҳеч қайси ўйин дуранг натижа билан тугагани йўқ. Ҳар бир баҳсда ҳисоб очилган турдан кейин гуруҳлардаги вазият билан танишинг.

"A" гуруҳи

Илк турда ҳамюртларимиз Аргентинага ютқазиб қўйган бўлса, Янги Зеландия Гватемалани кичик ҳисобда таслим қилди. Ушбу ўйинлардан кейин Аргентина гуруҳда биринчи ўринга чиқиб олди. Янги Зеландия иккинчи ва Ўзбекистон 3-поғонадан жой олган. Гватемала эса ҳаммадан ортда бормоқда. 

"B" гуруҳи

Словакия Фижини аяб ўтиргани йўқ. Нақ 4 марта рақиблар дарвозасини ишғол қилган европаликлар пешқадамга айланиб олди. АҚШ эса Эквадорни минимал ҳисобда таслим қилиб, 2-ўриндан жой олди. 3-ўринни Эквадор эгаллаган бўлса, Фижи сўнгги ўринга жойлашди. 

"C" гуруҳи

Кейинги гуруҳдан ўрин олган жамоалар кучини аяган кўринади, учрашувларда кўп гол урилгани йўқ. Колумбия Исроилни қийинчилик билан мағлуб этди. Япония - Сенегал баҳсида "кунчиқар" давлатдан келган футболчилар зафар қучди. Колумбия 1-ўринга, 2-ўринга Япония чиқиб олди. Исроил 3, Сенегал эса 4-ўринда қолди. 

"D" гуруҳи

Анча кучли терма жамоалар йиғилган "D" гуруҳидаги ўйинлар қизиқарлироқ ўтди ва кўпроқ голлар урилди. Италия Бразилия учрашувида италияликларнинг қўли баланд келди. Мазкур баҳсда Касадеи дубль қилиб, турнир тўпурари бўлиб турибди. Шунингдек, "скуадра адзурра" пешқадамликни қўлга киритди. Иккинчи ўйинда Нигерия Доминик Республикасини мағлуб қилиб, 2-ўриндан жой олди. 

"E" гуруҳи

Уругвай Ироқ дарвозасига жавобсиз 4 та гол киритиб, чемпионатда энг кўп гол урган иккинчи жамоага айланди. Англия ҳам гол қўйиб юбормай, ғалаба қозонди. "Уч шерлар" Тунисни 1:0 ҳисобида мағлубиятга учратди. Гуруҳда Уругвай биринчи ўринга чиқиб олди. Ундан кейинги ўринга Англия жойлашди. Тунис учинчи ва Ироқ 4-поғонада.

"F" гуруҳи

Сўнгги гуруҳда кутилмаган натижа қайд этилди. Осиё кубогида Ҳайдаров шогирдларига енгилган Жанубий Корея Франция устидан 2:1 ҳисобида ғалаба қозонди ва 2-ўринга чиқиб олди. 1-ўринда эса Гондурасни мағлуб қилган Гамбия жой олди.