УЕФА Федерико Вальвердега нисбатан жазо қўлламайди

УЕФА "Реал Мадрид" ярим ҳимоячиси Федерико Вальвердега нисбатан интизомий чора қўлламасликка қарор қилди.

Европа Чемпионлар лигасида 1/8 финалга чиқиш учун ўтказилган илк ўтиш баҳсида "Бенфика" ўз майдонида 0:1 ҳисобида мағлуб бўлган эди. Учрашувнинг 82-дақиқасида Вальверде рақиб ҳимоячиси Самуэль Дальни уриб юборган, футболчи майдонга йиқилиб, чаккасини ушлаб қолган. Бироқ бош ҳакам Франсуа Летексье уругвайлик футболчини жазоламаган.

"Бенфика" мазкур эпизод юзасидан УЕФАга шикоят киритган ва Вальверде қизил карточка олиши керак эди, деб ҳисоблаган. Бироқ "El Partidazo де COPE" маълумотига кўра, ташкилот португалияликлар шикоятини рад этган. Шу тариқа, Вальверде ўз ҳаракати учун жазосиз қолади.