"UFC 328" турнири: Фаворит номи аниқ, амалдаги чемпион эски чемпионга қарши…

Ўзбекистон вақти билан 9 майдан 10 майга ўтар кечаси, соат 02:00 да старт оладиган "UFC 328" турнирининг марказий тўқнашувига тўхталиб ўтамиз.

Аввало нега бу жанг бошқа тўқнашувларга қараганда кўпроқ шов-шув кўтараётгани ҳақида суҳбатлашсак.

Бир замонлар икки спортчи бирга машғулот қилган. Омма орасида "Уйдаги гап ташқарига чиқмаслиги керак" деган гап бор. Яъни машғулот пайтидаги гаплар-сўзлар ташқарига олиб чиқилмаслиги лозим. Хамзат эса машғулотларда Стиклэндни енгаётганини интервьюларида жар солиб юрибди. Шу боис, қаҳрамонларимиз орасидан қора мушук ўтган. Бир тарафда кучли нафрат бириккан бўлса, нариги тарафнинг асаб билан боғлиқ муаммолари мавжуд эканини жуда яхши биласиз.

Дана Уайтнинг айтишича, ҳар икки спортчи фарқли меҳмонхоналарга жойлаштирилади. Чунки беллашувга қадар иккиси ёнма-ён келиб қолмаслиги зарур. Бу ҳали ҳолваси. Жанголди матбуот анжуманида ҳам қўриқлаш ҳамда тартибга солиш хизмати ходимларига катта иш тушади ва яхшигина сафарбарлик амалга оширилади. Шояд бу ҳам кор қилмай "сола-сол" бошланиб кетса, мазкур жанг бекор қилиниши ҳам мумкин. Ортидан бир қанча молиявий, интизомий жарималарга ҳам гувоҳ бўлсак ажабмас.

Хорижлик журналистнинг Стриклэндга берган “жангдан кейин рақиб билан дўстона қўл сиқишиб қўйасанми?” саволига “асло бундай бўлмайди, биз ўлгунча душман бўлиб қоламиз”, деб айтиб ўтди. Хамзат эса эътибор бермасликка ҳаракат қиляпти, зеро асаби билан боғлиқ муаммолари бор, жарималарга тушиб қолмай, демоқда. Лекин матбуот анжуманида ўзаро тўқнаш келганлари он Стриклэнддан ножўя сўзлар эшитса, нима қилади, вақт кўрсатади.

Шон Стриклэнд – собиқ чемпион. У Исраэль Адесаньядан қабул қилиб олган эстафета таёқчасини Дрикус дю Плессига топширган эди. Қайтариб олишга уринди, уддасидан чиқолмади. Лекин камарни жанубий африкаликдан тортиб олган шахс – Хамзат Чимаев.  Дю Плессига тиши ўтмаган Шоннинг Хамзатга тиши ўтишини тасаввур қилиш қийин.

Техник услубига тўхталадиган бўлсак, ҳимояланиш борасида Шон ўрта вазндаги энг яхши кўрсаткичга эга спортчи ҳисобланади. "Страйкинг"дан мудофааси ажойиб, аммо грэпплингдан ҳимояси ҳақида бундай дея оламизми? Йўқ, албатта. Грэпплинг борасида ундан яхшироқ ҳимоялана оладиган ММАчилар ҳам бор. "Гард" ҳолатида бироз ноодатий позицияси мавжуд. Ортдаги қўли жағига яқин жойлашган, олд қўли эса пастроқда туради. Оз ва соз зарбалар йўллашга ҳаракат қилгани боис, унинг иштирокидаги баҳслар қизғин тус олавермайди. Интизомли жанг қиладиган спортчи тартибсизликни хуш кўрмайди. Лекин ушбу тўқнашувда том маънода хаос ҳукм суради. Чунки чечен мазкур баҳснинг хронологиясини белгилайди.

Хамзат Чимаев – енгилмас машина. Деярли барча жангларида яққол устунлик билан ғалабаларни тахлаб ташлаган. Шафқат нелигин билмайди. Қони жўшиб туради ва энергияга бой. Ичидаги йиртқич ҳайвон жанг бошланмасдан аввал отилиб чиқади, то тугагунига қадар қутурган ит каби тиним билмайди. Қаршисидаги рақибга ачинасан киши. Ваҳшати ила қалбларга даҳшат солади.

Техник услубига тўхталадиган бўлсак, Чимаев "страйкинг"даги маҳорати билан шухрат қозониб, грэпплинг билан чўққига эришган спортчи ҳисобланади ва октагонда исталган услубда жанг қила олади. 

Хулоса қилиб айтганда, ушбу баҳсда яққол фаворит сифатида Хамзатни кўрсатишимиз мумкин. Шон эса бу қарама-қаршиликка маҳсус кардио борасида ишлаб келмаган бўлса, жанголди прогнозларимиз амалга ошиш эҳтимоли юқори.

Азизбек ҒОЗИЙ тайёрлади