Улар гол уришни қойиллатди ёхуд дебют ўйинидаёқ қаҳрамонга айланганлар бор...

Жума, шанба ва якшанба кунлари Суперлиганинг 13-тур учрашувлари ўтказилганини яхши биласиз.

Шу тариқа, чемпионатимизнинг биринчи давраси якунланди. Аммо 6 августдан иккинчи давра баҳслари давом эттирилади. Унгача 5 июлдан трансфер ойнаси очилган бўлиб, бу муддат 31 июлга қадар давом этди.

Чунки, хабарингиз бор, 12-турдан кейин чемпионатимизда ёзги таътил эълон қилинди. 12-турнинг охирги учрашуви 3 июлда ўтказилган бўлиб, 30 июлдан жамоалар 13-турда беллашишни бошладилар. Унгача эса Суперлига иштирокчилари селекция ишлари билан бирга ўқув-машғулот йиғинларини олиб бордилар. Клублар таркибида эса ўзгаришлар юз берди. Жамоалар ўз сафига қўшиб олган аксарият янги ўйинчилар дебютларини ўтказишга эришдилар.

Эътиборлиси, янги клубида илк бор майдонга тушган футболчилардан айримлари дебют учрашувдаёқ гол уришди. Бу голлар эса жамоаларга очко тақдим этишда жуда асқотди дейишимиз мумкин. Тушуниб турган бўлсангиз, мазкур мақола айнан 13-турда дебют ўйинида гол урган футболчиларга бағишланади.

Оквара Годвин Чика

Янги ном, янги футболчи! “Машъал” клуби охирги пайтларда Африка қитъасидан бўлган легионерлар билан ҳамкорликни яхши йўлга қўйди. Жамоа сафидаги жамийки хорижлик ўйинчилар ўша ёқдан келган. Ёзги трансфер ойнаси очилган пайтда муборакликлар нигерлиялик ҳужумчи Оквара Годвин Чикани таклиф қилди. У 1997 йил 1 сентябрда Нигериянинг Абиа штатида таваллуд топган. Фаолияти давомида Нигерия, Эфиопия, Сейшел ороллари, Того каби чемпионатларда тўп сурган. Чика “Машъал” билан икки йиллик шартномага имзо чекди.

годвин1

Чика 30 июль куни клуби билан келишувга эришганлиги расман эълон қилинди. Янги жамоасига қўшилганига ҳали кўп вақт бўлмаган янги легионер шу куни “Машъал”нинг “Сурхон”га қарши учрашувида дебютини ўтказди. Ўзига 10-рақамни танлаган ҳужумчи ўйинни асосий таркибда бошлади. Аввалига ўйиннинг 47-дақиқасида “Машъал”нинг нигериялик бошқа бир ҳужумчиси Самуэль Чигози ҳисобни очади. 74-дақиқада меҳмонлар ҳисобни тенглаштирган маҳалда мезбонлар ҳаммасини яна бошидан бошлашига тўғри келди. Бу пайтга келиб вақт ҳам тобора ўз қолаётганди. Рақибнинг голидан 7 дақиқа ўтгач, катта саҳнага 24 ёшли Годвин Чика чиқди. У ўзи учун яратилган қулай имкониятдан унумли фойдаланди ва ўта қимматли гол уриб “Машъал”ни ҳисобда яна олдинга олиб чиқди. Якунда эса муборакликлар уч очкони қўлга киритди. Ҳужумда нигериялик Чигози билан Чиканинг тандеми “Сурхон”га қарши учрашувда ўзини оқлади ва иккала легионер “Машъал”нинг голларига муаллифлик қилгани эътиборлидир.

Забелин ва Абдуллажонов

31 август куни Намангандаги “Навбаҳор” стадионида “Андижон” ҳамда “Турон” клублари ўртасидаги ўйин бўлиб ўтди. “Бобур арена”да ёритгич тизими билан боғлиқ муаммо борлиги сабабли “Андижон” ўз ўйинларини вақтинча “Навбаҳор” стадионида ўтказиб турибди. “Турон”га қарши учрашув эса янги водий дербиси номи билан бевосита боғлиқ эди. Бу ўйинда ғолиб жамоа аниқланмади. Водий дербисида томонларнинг кучлари тенг келди – 1:1.

Қизиғи, жамоаларнинг голларига дебютини ўтказаётган футболчилар муаллифлик қилди. Учрашувнинг 38-дақиқаси ўтиб бораётган маҳалда “Турон”га яқинда қўшилган ярим ҳимоячи Суннатилла Абдуллажонов қанотдан оширилган тўпни боши билан дарвоза тўрига жойлаб ҳисобни очди. Бу ўйинчи биринчи даврани “Бунёдкор” сафида ўтказиб, 8 та учрашувда майдонга тушган. Абдуллажонов жорий мавсумдаги илк голини эса айнан “Турон” таркибида киритишга муваффақ бўлди. Қизиғи, у ўз вақтида “Андижон” сафида ҳам тўп сурган. Шунингдек, Абдуллажонов “Қизилқум”, АГМК каби клубларда ҳам фаолият олиб борган.

забелин

“Андижон” жамоаси иккинчи бўлимнинг 51-дақиқасида жавоб голини урди. Клубга эндигина қўшилган легионерлар шу куни янги жамоаси сафида дебютини ўтказдилар. Беларуслик Павел Забелин қанотдан оширилган тўпни жарима майдони ичида тўхтатмасдан рақиб дарвозасига жойлаб қўйди. Чиройли гол! Якунда унинг голи "Андижон"ни мағлубиятдан сақлаб қолгани маълум бўлди. Гапнинг очиғи, 26 ёшли ҳужумчи “Турон”га қарши учрашувни жуда фаол ўтказди. У майдоннинг ҳар бир қарич ерида тўп учун яхши курашди ва жамоасининг муҳим ўйинчисига айланди. Натижада учрашувнинг энг яхши футболчиси деб айнан Забелин эътироф этилди. Мазкур ўйинчи бунгача асосан Беларусь чемпионатида фаолият олиб борган. Дарвоқе, “Андижон” сафида Забелиндан ташқари яна икки нафар янги легионер – Совпел билан Васильев ҳам дебютларини ўтказдилар. Аммо уларга қараганда, Забелин анча фаоллиги билан ажралиб турди.

Иброҳим Ибрагимов

Яна бир баҳс Бекободда “Металлург” – “Қизилқум” ўртасида ўтказилди. Ушбу ўйинда майдон эгалари рақибига 1:2 ҳисобида имкониятни бой берди. Шу куни “Металлург” сафида янги футболчилардан 2001 йилда туғилган Иброҳим Ибрагимов дебютини ўтказди.

Истеъдодли ярим ҳимоячи ўтган йили ва бу мавсумнинг биринчи қисмини “Бунёдкор” сафида ўтказиб келди. Ёзги трансфер пайтида  ушбу ўйинчи “Металлург”га эркин агент сифатида кўчиб ўтди ва 2024 йилгача мўлжаллаган шартномага қўл қўйди. Келажаги порлоқ эканлиги айтилаётган ушбу ўйинчи Игнатий Нестеров қўриқлаётган дарвозага шундай гол урдики, буни ҳатто “Қизиқлум” дарвозабони тушларида ҳам кўриб чиқса ажаб эмас.

ибрагимов

“Металлург” сафида биринчи расмий учрашувида майдонга тушган 20 ёшли Ибрагимов бурчак зарбасини ўйинга киритган пайтда ҳеч ким тўп тўғри дарвоза тўрига бориб тушишини кутмаган бўлса керак. Иброҳим эса зарбани амалга оширгач, тўп тўғри дарвоза тўридан жой олди. Бу вазиятда Нестеров ҳам бу ёш футболчининг тўпни бурама тарзда тўғридан-тўғи дарвозага йўллашини кутмаганди. Бу гол ўйинни безади, десак адашмаймиз. Шуни айтиш керакки, Иброҳим Ибрагимов фаолиятидаги биринчи голини “Металлург” сафида киритди. Аммо бу гол жамоасини мағлубиятдан қутқатиб қолишига етарли бўлмади. Лекин бундай гол доим ҳам киритилавермайди...  

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию