УзПФЛ футзал мусобақаларини янги босқичга олиб чиқиш учун муҳим қадамни ташлади

Ўзбекистон Профессионал футбол лигаси бир вақтнинг ўзида футзал чемпионатларини ҳам ўтказиб келади. Бугунги кунга келиб футзал Олий лигаси, Биринчи лига, футзал бўйича мамлакат кубоги ва суперкубоги каби мусобақалар бевосита Лига томонидан ташкиллаштирилади. 

2023/24 йилги мавсумдан бошлаб футзални янада оммалаштириш учун Лига навбатдаги қадамни ташлади ҳамда ҳаваскорлар футболини ривожлантириш маркази билан ишлашга қарор қилди. Келишувга кўра, футзални ёритиб бериладиган алоҳида сайт очилиб, у тез орада оммага эълон қилинади. 

Янги сайт Ўзбекистон футзал чемпионати учрашувлари, қайдномалари, статистикаларини ўзида тўлиқ акс эттиради. Шунингдек, футзал терма жамоалари ҳам четда қолиб кетмайди. Мазкур сайт ҳар бир профессионал футзалчи ҳақида маълумот бериши мумкин бўлган контентга айланиб боради. 

Шунингдек, Ўзбекистон кубоги мусобақаси учун ҳаваскор жамоаларни жалб этиш каби масала ҳам алоҳида ўрганиб чиқилаётганини қайд этиш керак. Сўнгги уч йилда Олий лига ва Биринчи лига анча тартибга келтирилган бўлса, эндиликда қуйи бўғинларга ҳам кириб бориш имкониятлари очилади. 

Маълумот учун, футзални оммалаштириш йўлида мусобақалар географияси йилдан-йилга кенгайиб бормоқда. Бугунга келиб Лига футзал чемпионати учрашувларини нафақат Тошкент, балки Фарғона, Олмалиқ, Жиззах, Қарши, Урганч каби шаҳарларида ҳам ташкил этишни йўлга қўйган. 2023/24 йилги мавсумдан бошлаб яна бир қатор шаҳарлар мазкур рўйхатга қўшилиши мумкин. Шунингдек, футзал чемпионати ўйинлари YouTube орқали жонли эфирга узатилади. Ишонамизки, Ҳаваскорлар футболини ривожлантириш маркази билан ҳамкорликда биз янги босқичга қадам қўямиз.