Виктор Кумиков

Чемпионатлар тўхтатилган бир вазиятда футболга оид қандайдир янгилик ёки муҳим воқеалар дарҳол мухлисларнинг эътиборини тортмасдан қолмайди. Айниқса, футболсиз зерикиб қолганлар учун унинг атрофида юз бераётган ҳодиса ва хабарлар ўзига хос янгилик сифатида туюлиши ҳам ҳеч гап эмас.

Ўзимизнинг Суперлигамиз ҳам март ойининг ўртасидан тўхтатиб қўйилган ва табиийки, ишқибозлар футбол ўйинларини соғинишган. Ҳозирги пайтда эса барча клубларнинг футболчилари индивидуал тарзда шуғулланишаётганини ижтимоий тармоқлар орқали ҳам кўриб турган бўлсангиз керак. Хўш, мавжуд вазиятда мухлисларни нима ёки қандай хабарлар билан қизиқтириш мумкин? Чунки бирор янгилик ҳақида ёзай десангиз, Суперлигамизда футболчиларга тааллуқли бўлган трансферлар ойнаси ҳам ёпилган.

Лекин мураббийлар масаласида ўзига яраша хабарлар чиқиб турибди. Аниқроғи, ҳозирги пайтда чемпионатимиздаги айрим клубларимизда бош мураббий лавозими бўшаб қолган. Шу сабабли ана шундай жамоаларга қатор мутахассисларнинг номларини боғлаётганлар ҳам бор. Аслини олганда ҳам бундай кезларда бош мураббийсиз қолган клубнинг у ёки бу мутахассис билан музокара ўтказаётгани ё бўлмаса унга қизиқиш билдираётгани ҳақидаги гап-сўзлар пайдо бўлиши табиий.

Биз мазкур мақола орқали шунга ўхшаш вазият ҳақида сўз юритмоқчимиз. Ёдингизда бўлса, сайтимиз орқали март ойида россиялик тажрибали мураббий Виктор Кумиков билан уюштирилган суҳбатни ҳукмингизга ҳавола қилгандик. Кейинчалик эса у карантин пайтида бошқа мамлакатларга авиарейслар бекор қилингани сабабли юртимизда қолиб кетгани маълум бўлганди. Табиийки, унинг бу ерда эканлиги айрим клубларимиз учун айни муддао бўлиши мумкин ҳам эди. Масалан, бош мураббийсиз қолган “Андижон” клуби ушбу лавозимга бошқа номзодларни кўриб чиқаётгани ҳақидаги хабарлар қулоғимизга чалинганди.

Шу нуқтаи назардан олиб қараганда, карантин пайтида мамлакатимизда бўлиб турган ва ҳозирда ҳеч бир клубда ишламаётган Кумиков номзоди ҳам андижонликларнинг эътиборини тортган бўлиши мумкин. Шунинг учун бўлса керак, охирги пайтларда клубнинг мазкур мураббий билан музокаралар олиб бораётгани ҳақидаги гап-сўзлар ҳам тез-тез эшитилмоқда. Хўш, бу хабарлар қанчалик асосли ёки ҳақиқатга яқин? Ҳозирда Янгиерда бўлиб турган Виктор Балютович билан боғланганимизда дастлаб юқоридаги масалани ўртага ташладик.   

кумиков1

- Виктор Балютович, қандай қилиб карантин пайтида юртимизда қолиб кетдингиз? Айни пайтда футболсиз зерикиб қолмаяпсизми?

- Табиийки, футболсиз доимо зерикарли туюлаверади. Бу ерда қолишимга эса парвозларнинг бекор қилингани сабаб бўлди. Ҳозирда эса мен Янгиердаман.

- Эшитишимча, сизга “Андижон” клуби томонидан қизиқиш бўлган. Улар чиндан ҳам сизга таклиф билан чиқишдими?

- Мен бу ҳақида ҳеч нима билмайман. Ҳозирча ҳеч ким ҳеч нима демади. Яна нима дейишим мумкин? Карантин бошланган, кўриб турганингиздек, ҳозирги пайтда ҳеч кимнинг кўнглига футбол сиғмаяпти. Шундай экан, ҳозир ҳеч ким футбол билан қизиқмаяпти. Эҳтимол, карантиндан кейин қандайдир янгилик бўлиб қолар...

- Виктор Балютович, айтинг-чи, умуман олганда, “Андижон” варианти сизни қанчалик қизиқтирмоқда...

- Аслида ҳар қандай вариант ҳам қизиқ, лекин аввалига гаплашиб кўриш, шароитларини ўрганиш даркор. Ҳар қандай вариантни муҳокама қилиш керак. Ишимга қизиқиш борми ёки йўқми, бунга музокаралар жараёнида аниқлик киритилади.

- Сизга яна бошқа таклифлар ҳам бўлиб турибдими?

- Ҳозирча йўқ. Ўзингиз кўриб турганингиздек, айни пайтда ҳамма жойда карантин даври. Шу сабабли ҳозирча ҳеч қанақа янгилик йўқ. Ахир ҳеч ким шунчаки пул тўлашни хоҳламайди. Карантин бекор қилинганидан кейин машғулотлар бошланса, эҳтимол шундан сўнг қизиқарли вариантлар бўлар.

Ўзингиз гувоҳи бўлганингиздек, ҳозирча Кумиков “Андижон” варианти ҳақида жўяли фикр билдиришдан йироқ бўлиб турибди. Балки чиндан ҳам клуб ушбу мутахассис билан музокара ўтказгандир ёки бу қуруқ гап-сўздир. Лекин бир томондан қараганда унинг айтган гаплари ҳам тўғри. Яъни, ҳозирги пайтда карантинда футбол кўнгилга сиғармиди? Аммо умид қиламизки, вазият албатта ижобий томонга ўзгаради ва бошқа спорт турлари каби футбол бўйича Ўзбекистон чемпионатига ҳам рухсат берилади.

кумиков2_1

Охирги пайтларда вазият яхши томонга ўзгараётгани сабабли май ойининг ўрталарида клубларнинг машғулот ўтказишлари учун рухсат берилиши мумкинлиги ҳақидаги гап-сўзлар ҳам йўқ эмас. Лекин булар ҳозирча миш-миш холос. Барибир чемпионатимиз қачондан бошлаб давом эттирилиши борасида аниқ бир гап айтиш қийин. Қолаверса, Суперлига ўйинлари яна давом эттириладиган бўлса, у қандай тартибда ўтади? Стадионга мухлислар киритиладими ёки ўйинлар бўш трибуналар қаршисида ўтказиладими? Бу ҳам ўйлантирадиган масала, албатта. Биз эса бу борада Виктор Кумиковнинг фикрларини билишга қизиқдик.

- Умуман, кейинги режаларингизни ишлаб чиқяпсизми?

- Аниқ бир нарса дея олмайман. Ҳаммаси карантиннинг тугашига боғлиқ. Албатта, бундай пайтда ҳеч нимани режалаштириб бўлмайди.

- Карантиндан сўнг чемпионатимизни қай ҳолатда ўтиши кўпчиликни қизиқтирмоқда. Ўйинларнинг мухлисларсиз ўтиши ҳам эҳтимолдан ҳоли эмас. Бу борада сизнинг қарашларингиз қандай?

- Футбол мухлислар билан бўлгани яхши, барибир, аммо карантин бекор қилиниб, вазият бунга имкон берса, албатта. Мухлисларсиз футбол футбол эмас.

Яна бир гап: аслида бирор-бир мураббийни олиб келиш ва у билан келишиш осон жараён ҳисобланмайди. Чунки ҳар кимнинг ҳам ўзига яраша талаб ва истаклари бўлади. Бундай пайтда эса клуб билан мураббийнинг қарашлари ва фикрлари бир жойдан чиқсагина шунда ҳамкорлик борасида келишиш нисбатан осонроқ кечади. Лекин ҳар ким ўз имконияти ва чўнтагига қараб иш кўради. Шунга яраша мураббийларни ҳам рози қилиш керак. Аммо қиммат мураббийлар ҳақида ҳам эшитиб турамиз. Айтайлик, биз билан мулоқотда бўлган россиялик Виктор Кумиковни қиммат мураббийлар тоифасиданлиги ҳақида ҳам эшитгандик. Фурсатдан фойдаланган ҳолда шу ҳақида ўзининг муносабатини билишга ҳаракат қилдик.

- Қизиқ савол: сизни нархи қиммат мураббий деб ҳам аташади. Бунга муносабатингиз қандай?

- Буларнинг барчаси нисбий тушунча. Мана шу холос. Кимга нисбатан қимматроқ эканман? Масалан, Моуриньо мендан анча кўп пул олади. Шундай экан, қиммат ёки қиммат эмас, бунинг нисбий эканлиги тушунарли.

Матнда хатолик топсангиз, ўша хатони белгилаб, бизга жўнатинг (Ctrl + Enter)