“Вилла” сардори босқинчилар томонидан ўлдирилди

Уганданинг “Вилла” клуби  сардори Дэвид Овори номаълум шахслар ҳужумидан кейин вафот этди. Бу ҳақда клуб матбуот хизмати хабар берди.

- Капитанимиз Дэвид Оворининг бевақт вафот этганини чуқур қайғу билан маълум қиламиз. У номаълум шахслар ҳужумидан сўнг шифохонада даволанаётган эди. Унинг оиласига чуқур ҳамдардлик билдирамиз ва улар учун дуо қиламиз, - дейилади клуб баёнотида.

Daily Monitor нашрининг ёзишича, кечқурун 27 ёшли футболчи яшаш жойи яқинида номаълум шахслар томонидан ҳужумга учраган. Овори оғир аҳволда шифохонага олиб борилган, аммо шифокорлар унинг ҳаётини сақлаб қола олмаган.

Овори ҳимоячи ва ярим ҳимоячи позицияларида тўп сурган. У 2023/2024 йилги мавсумда “Вилла”га сўнгги 20 йил ичида илк бор Уганда чемпионлигини қўлга киритишга ёрдам берган ҳамда клуб тарихидаги рекорд даражадаги 17-чемпионлик унвонини тақдим этган.