Винисиус "Реал"да ўзини қадрланмаётгандек ҳис қила бошлади

Мадриднинг «Реал» жамоаси ҳужумчиси Винисиус Жуниор сўнгги ҳафталарда клубнинг «Атлетико» форварди Хулиан Альварес ва «Бавария» ҳужумчиси Майкл Олисега қизиқиши ортидан ўзини етарлича қадрланмаётгандек ҳис қила бошлади. Бу ҳақда AS нашри хабар берди.

Манба маълумотига кўра, бразилиялик вингернинг ўйин даражаси юқори бўлишига қарамай, «Қироллик клуби» аввал жарималар майдони ортида ҳаракат қиладиган ярим ҳимоячи Жуд Беллингемни олиб келди, шундан сўнг эса ҳужумчи Килиан Мбаппе билан шартнома имзолади. Шу боис Винисиус ўзини жамоада иккинчи даражали фигурага айлангандай туя бошлаган.

Шу билан бирга, «Реал» раҳбарияти 26 ёшли футболчини ҳали ҳам жамоанинг энг муҳим ўйинчиларидан бири сифатида кўришда давом этмоқда. Винисиус эса «Лейпциг» вингери Ян Диомандни сотиб олиш эҳтимолига қарамасдан, испан гранди таркибида асосий фигура сифатида қолишни истаяпти.

Винисиус ва «Реал» ҳамкорликни давом эттириш тарафдори, бироқ томонлар 2027 йил ёзида тугайдиган шартномани узайтириш шартлари бўйича келиша олмаяпти. Ҳужумчи янги битим доирасида йиллик 20 миллион евро маош талаб қилмоқда.