Винисиус “Реал”дан кетмоқчи: Мен ўзимни кераксиз ҳис қилган жойда ўйнамайман!

Мадриднинг “Реал” клуби ҳужумкор футболчиси Винисиус Жуниор Ла Лиганинг 20-турида “Леванте”га қарши ўтказилган ўйиндан (2:0) сўнг, яқинларига жамоани тарк этиш истагини билдирган.

Ўша ўйинда мадридлик мухлислар уни ҳар бир тўпга тегишида ҳуштакбозлик қилган эди.  Бу ҳақда El Periodico газетаси хабар бермоқда.

- Мен ўзимни кераксиз ҳис қилган жойда ўйнашни истамайман, - деган бразилиялик юлдуз.

Таъкидланишича, мухлисларнинг ҳуштаклари Винисиус учун “охирги томчи” бўлган. У “Реал” ишқибозларининг ўзига нисбатан салбий муносабатидан чарчаган ва клуб учун қилган хизматларини етарлича қадрланмаяпти, деб ҳисоблайди.

Винисиус 2018 йилдан бери “Реал” сафида ўйнаб келмоқда. Жорий мавсумда у барча мусобақаларда 29 та ўйинда иштирок этиб, 6 та гол ва 8 та голли узатма амалга оширган.

Унинг шартномаси 2027 йилнинг ёзигача амал қилади. Клуб раҳбарияти агар ҳамкорлик муддати шу мавсум охиригача якунланмаса, Винисиусни ёзда сотиб юбориши мумкинлиги айтилмоқда. Transfermarkt порталига кўра, футболчининг бозор қиймати 150 миллион еврони ташкил этади.