Владимир Бубанья: "Ҳозир ҳисобдан кўра яхши ўйин кўрсатиш муҳимроқ"

“Андижон” клуби ҳам айни пайтда Туркиянинг Анталия шаҳрида ўз йиғинини ўтказаётганидан хабардор бўлсангиз керак.

“Бургутлар” бор эътиборини машғулотларга ва назорат учрашувларига қаратган. Чунки ушбу хориж йиғини жамоа учун жуда муҳим ҳисобланади. “Андижон”нинг сербиялик легионери Владимир Бубанья жумладан шундай деди:

“Янги мавсумга тайёргарликнинг иккинчи йиғинини Анталияда бошладик. Аввалгиси Тожикистонда кечди. У ерда югуришга эътибор қаратдик. Туркияда шароитлар анча яхши. Майдонлар мукаммал. Биринчи назорат учрашуви Корея ёшларига қарши кечади. Менимча, бу қизиқарли ўйин бўлади. Улар ҳам бизга ўхшаб тез ўйнашади. Бизда ҳам иқтидорли ёшлар кўп. Ҳар бир футболчи ўйин амалиётига эга бўлади, деб ўйлайман. Ҳозир ҳисобдан кўра яхши ўйин кўрсатиш муҳимроқ”.

“Андижон” клуби бундан аввал Тожикистонда йиғин ўтказганди. Бу сафар эса иккинчи хориж йиғини тариқасида Анталияда шуғулланмоқда. Бубанья сўзида давом этар экан, бу ерда асосий эътибор нимага қаратилаётганига ҳам тўхталди.

“Биз бу ерда техник ва тактик устида машқ қиламиз. Ҳар бир машғулот қизиқарли кечяпти. Ўзгаришлар кўп, бир қанча ўртоқлик ўйинларида майдонга тушамиз. Ўтган йилгидан кўра яхшироқ ўринни олишга ҳаракат қиламиз”.

“Андижон” Анталияда номдор клуб – Россиянинг ЦСКА жамоасига қарши ҳам ўйнайди. Бу баҳсга қизиқиш катта. Албатта, бугун бўлиб ўтадиган Жанубий Корея олимпия терма жамоаси билан учрашувга ҳам эътибор кам эмас. Бубанья эса “армиячилар” билан бўлажак ўйин хусусида гапирди.

“Ҳар бир футболчи учун ЦСКАга қарши яхши ўйин бўлади. ЦСКА ҳам шу ерда, биз ҳам. Албатта, ўртамизда фарқ бор. Қандай даражада эканлигимизни билиб оламиз. Мен ўзим ҳам бу каби клубларга қарши тўп сурганман. Масалан, “Зенит” билан. Илгари Сербия олимпия терма жамоаси билан йиғинларда ҳам шунга ўхшаш кўплаб клублар билан тўқнаш келганмиз”.

Шуҳратбек Жўраев.