Хаби Алонсо энг машҳур юлдузни “Реал”дан йўқотадиган бўлди

Тез орада “Реал” бошқарувида ўзгариш рўй беради. Италиялик мутахассис Карло Анчелотти ўрнини “Байер”да муваффақиятли ишлаб келган Хаби Алонсо эгаллайди.

Испаниялик мутахассиснинг Мадридга келиши “Реал”нинг ҳозирги таркибида ўйнаётган айрим ўйинчилар учун қимматга тушади. Хусусан, жамоадаги ягона “Олтин тўп” соҳиби Лука Модрич ўзига бошқа жамоа топишга мажбур бўлиши айтилмоқда.

Хаби Алонсо 39 ёшли хорватиялик футболчининг “Реал” учун катта аҳамиятга эга эканини жуда яхши тушуниб турибди, бироқ у Модрични келажакдаги режаларига киритишни истамаяпти ва ўзи амалга оширадиган лойиҳага ёши ўтиб қолган плеймейкерни киритмоқчи эмас.

Алонсо майдон марказида таркибдаги бошқа ўйинчиларни қўймоқчи ва бундан ташқари, клуб хўжайинларидан ўзига маъқул ярим ҳимоячи олиб беришни сўраган.

Охирги воқеалар ривожидан келиб чиқиб, хулоса қиладиган бўлсак, Модричнинг 30 июнь куни тугайдиган битими катта эҳтимол билан узайтирилмайди.