Хабиб Нурмагомедов қўрқдими ёки қарори тўғри эдими? (Мутахассислар фикри)

Барча ММА мухлислари 18 апрель куни бўлиб ўтиши керак бўлган, UFC 249 турнирини орзиқиб кутишаётган эди. Тўғрироғи, марказий жангдан ўрин олган Хабиб Нурмагомедов ҳамда Тони Фергюсон ўртасидаги қарама-қаршилик барчанинг диққат эътиборида бўлиб турганди. Хаттоки, бутун жаҳонда авж олаётган коронавирус пандемияси ҳам бу жангга тўсқинлик қила олмаслиги борасида таассурот уйғонаётгандек эди. Ҳар ҳолда UFC президентининг баёнотлари бунга туртки бераётганди.

Лекин россиялик UFC нинг енгил вазн тоифаси чемпиони Хабиб Нурмагомедов мазкур жанг борасида ўз муносабатини билдирди ва бу тўқнашув бекор бўлишига сабаб бўлди.

Бу қарор борасида интернет тармоқлари, ҳориж ОАВ ларида турли хил фикрлар билан тўлиб тошди. Аксарияти буни тўғри қарор деб билса, кўпчилик Нурмагомедовни қўрқоқликда айблашмоқда. Аслидачи, бу тўғри қарор эдими?

Бу борада мамлакатимизда ушбу спорт тури бўйича фаолият олиб борадиган мураббийлар, спортчилар ва журналистларни фикри билан қизиқдик.

Қуйида ушбу мулоҳазаларни эътиборингизга ҳавола этамиз.

Суннат Ильясов – ММА бўйича Ўзбекистон профессионаллар терма жамоаси мураббийи

- Бу борада фикр билдириш керак бўлса, шуни айтишим мумкинки, ҳозирги кундаги ер юзидаги коронавирус муаммоси туфайли барча мусобақалар қолдирилмоқда. Ҳамма ҳам ўзини эҳтиёт қилишни хоҳлайди. Хабибни қўрқди, деб айта олмайман. Агар, у жиддий жанглардан қўрқадиган спортчи бўлса, ушбу натижаларга эриша олмасди.

Нодир Қодиров – ММА мураббийи, “Ахмат” лигасининг Осиё минтақаси раҳбари

- Ҳозирги кундаги ҳукм сураётган муаммоларга нисбатан ниҳоятда тўғри қарорга келди. Ҳар тарафлама тўғри!

Азамат Муродов –журналист

- Жангни томошабинларсиз барчаси текширилиб, анализ топширган одамлар билан ўтказиш мумкин эди. Лекин Хабиб қўрқиб турган вазиятида пайдо бўлиб қолган имкониятдан фойдаланиб қолди.

Жасур Алижонов – ММА мураббийи

- Тўғри, деб ўйлайман. Қолаверса, бу қарорни бир ўзи эмас, жамоаси, отаси ва мураббийлари билан келишилган ҳолда қабул қилган.

Мансур Тўғизбоев – ММА рефериси ва мураббий

- Аслида, бутун дунёда карантин бўлиб турган вақтда бу турнирни ўтказилишини ўзи тушуниш қийин эди. Лекин улар орасида тўрт маротаба жангнинг қолдирилганлиги туфайли, шароит бўлса, муносабатларга ойдинлик киритиб олсалар яхши бўлар эди. Бир нима дейиш қийин...

Жасур Неъматов - Ўзбекистон К-1 федерацияси раҳбари

- Тўғри қарор қабул қилинган, деб ўйлайман. Сабаби, барибир томошабинларсиз бу жанг ўз жозибасини йўқотар эди. Тўғри жонли эфир бўлиши мумкин. Лекин арена тўла мухлислар кўз олдида жанг қилиш бу барибир бошқача бўлади. Қолаверса, Олимпиадалар қолдирилаётган бир вақтда бу турнирнинг ўтказилиши мантиқсизлик бўларди. Тўғри, ҳали ҳам ўтказилади, ушбу UFC 249 дейилмоқдаку, барибир инсоният олдида шундай глобал муаммо турганда буни тушуниш қийин назаримда... Хабибни қарорини олқишлайман. У нафақат ўзини балки жамоасини ҳам ҳаётини хавфга қўймади.

Тимур Муҳаммеджонов –Тошкент шаҳар кикбоксинг федерацияси раҳбари

- Хабиб тўғри қарор қабул қилди. Ўрнида мен ҳам шундай йўл тутган бўлардим. Бу сўнги имконият эмаску, ҳали барчаси яхши бўлиб кетса, улар яна жанг қилишлари учун имконият бўлади. Коронавирус дунёни ларзага келтираётган бир вақтда у ёқдан бу ёққа учиб юриш тўғри эмас.

Сардор Раҳимов – журналист

- Айни кундаги ҳолат юзасидан келиб чиқадиган бўлсак, бу жангнинг ўтказилиши шунчаки “абсурд”... Шу нуқтаи назардан у тўғри қарор қабул қилди.

Лиля Шакирова – GFC чемпиони

- Хабиб бутунлай жангдан воз кечди дегани эмас. Учишдаги муаммолар... Қисқа қилиб айтганда, ҳозирги кунда шу барча учун фойдали қарор эди.

Шер Мамазулунов – кикбоксингчи

- Ҳозирги вазиятдан келиб чиқиб, жангни тўхтатганлиги тўғри қарор, деб ҳисоблайман.

Азамат Нуфтиллаев – ММА жангчиси

- Хабиб биринчи навбатда ўзини ҳамда жамоасини хавфсизлигини ўйлаб ушбу қарорга келган. У қандай жангчи эканлигини исботлаб бўлган. Насиб қилса, улар ҳали учрашади ва ким кучли эканлигига ойдинлик киритиб оладилар.