Ханчжоу-2022: Бугун 7 та медаль қўлга киритилди, шундан 3 таси олтин!

Ассалому Алайкум қадрли спорт ишқибозлари. Осиё ўйинлари мусобақасининг навбатдаги кунига старт берамиз. Бугун, бир нечта ҳамюртларимиз юртимиз шарафини халқаро ареналарда ҳимоя қилади. Бугунги кун тартибидан ўрин эгаллаган спортчиларимизнинг чиқиш вақтлари билан танишинг.

Сизга қулай бўлиши учун, янгиликлар автоматик равишда шу хабар остида бериб борилади. Шунчаки, уни янгилаб турсангиз бўлгани! Кун давомида атлетларимизга омад ёр бўлишини тилаб қоламиз.

6:42. Олга Загелиская ўз чиқишларини бошлади ва муваффақиятли давом эттирмоқда

6:51. Кунни олтин медал билан бошладик. Олга Забелинская индивидуал велошоссе пойгасини 24:35.9 вақт билан 14 нафар спортчи орасида олтин медални қўлга киритди!

7:45. Конаеда эшкак эшувчи йигитларимиз жуфлиги финал йўлланмасига эга чиқмоқда! Олдинда финл!

7:55. Ханчжоу-2022: Каноечиларимиздан олтин медал!

Ўзбекистон делегациясида бугунги кун ҳисобидан иккинчи олтин медал. 1000 метрга каноечи йигитлар ўртасида кечган пойгада Шоҳмурод Холмуродов ҳамда Нурислом Тўхтасин ўғли жуфтлиги марра чизиғини биринчи бўлиб кесиб ўтди ва олтин медалга сазовор бўлишди.

8:05. Байдаркада эшкак эшиш бўйича финал баҳсларида иштирок этган ҳамюртларимиз финалда 29.939 сония натижа қайд этиб медаллардан қуруқ қолди.

Айни дамда медаллар жамғармаси бўйича умумий ҳисобда яна бешинчи ўринга қайтдик!

08:50. Қизларимиз бронзо медалларга эга чиқишди!

Байдаркада эшкак эшиш бўйича Ўзбекистон аёллар терма жамоасидан яна бир медал. 500 метрга кечган дастурда Шаҳризода Мавлонова, Арина Танатмишева, Екатерина Шубина ҳамда Юлия Борзова квартети марра чизиғини учинчи бўлиб кесиб ўтди.

08:49. Шерзодова, Зокирова жуфтлиги Осиё ўйинлари совриндори!

Байдарка ва каноеда эшкак эшиш басларининг сўнгги старти Ўзбекистон терма жамоаси учун омадли кечди. Унда аёллар ўртасида 200 метрга каноеда эшкак эшиш бўйича жуфтлик баҳслари бўлиб ўтди. Мазкур дастурда стартга чиққан Шоҳсанам Шерзодова ва Нилуфар Зокирова жуфтлиги бронза медалини қўлга киритди.

09:20. Спортча алпинизм. Асал Исмоилова иштирокини якунлади. 18 нафар спортчи орасида 15 ўринни банд қилган ҳамюртимиз финалга чиқа олмади.

10:15. Гимнастиканинг Тромплин йўналишида ҳамюртимиз Миршоҳид Ҳусайнбоев ўз иштирокини бошламоқда.

Байдарка ва каноеда эшкак эшиш бўйича Ўзбекистон терма жамоаси Осиё ўйинларини юқори нотада якунлади. Мусобақа давомида спортчиларимиз 1 та олтин, 2 та кумуш ва 3 та бронза, жами 6 та медал билан умумжамоа ҳисобида учинчи ўринни қўлга киритишди. Сўнгги стартларда бронза медалларига сазовор бўлган қизларимизнинг иштироки ва тақдирлаш маросимидан ёрқин суратларни томоша қилинг.

11:30. Нигина Ўктамова КХДР вакилласига имкониятни бой бериб қўйди. У мусобақанинг бронза медалларига эга чиқди.

11:42. Сувга сакраш баҳсларида Ўзбекистон терма жамоаси аъзолари Вячеслав Качанов ва Игорь Мялин саралашда муваффақиятли иштирок этди ва финал беллашувларига йўлланмани қўлга киритишди. 

11:45. Камондан отиш дастурида эса ҳамюртимиз Амирхон Содиқов чорак финалда Жанубий Корея терма жамоаси аъзосига қарши баҳсда 2:6 ҳисобида имкониятни бой бериб қўйди.

12:15. Трамполинда сакраш бўйича Ўзбекистон терма жамоаси аъзоси Миршоҳид Ҳасанбоев Осиё ўйинларининг финалига йўл олди. Ҳамюртимиз саралашда 56.400 балл жамғариб, бешинчи натижа билан ҳал қилувчи босқичга ўтди. Энди у бироздан сўнг медаллар учун кураш олиб боради.

12:33. Велоспортнинг шоссе йўналишида баҳсларда қатнашган ҳамюртимиз Алексей Фомовский 51:05.75 натижа қайд этди ва якунда 6-ўринни банд этди.

12:48. Боксчимиз Ҳасанбой Дўсматов ярим финал йўлланмаси учун покистонлик рақибига қарши рингга кўтарилмоқда.

13:08. Бокс бўйича Рио-2016 Олимпиадаси чемпиони Ҳасанбой Дўсматов ғалабали юришини давом эттирмоқда. -51 кг вазн тоифасида иштирок этаётган ҳамюртимиз чорак финалда покистонлик Зоҳайб Рашидни мусобақадан чиқариб юборди. Ушбу натижа орқали Дўсматов мусобақа медалини нақд қилди. Энди у финал учун япониялик Томоя Тсубоига қарши жанг қилади.

13:56. Камондан отиш бўйича Ўзбекистон терма жамоаси аъзоси Амирхон Содиқов Осиё ўйинларидаги иштирокини тугатди. Чорак финалда жанубий кореялик Вусеок Ли билан баҳс олиб борган ҳамюртимиз 2:6 ҳисобида имкониятни бой берди.

14:40. Ўзбекистон аёллар терма жамоасининг Осиё ўйинлари ярим финалидан ўрин олган КХДРга қарши учрашув учун бошланғич таркиби эълон қилинди. Учрашув 15:00 да старт олади:

16:00. Трамполинчимиз Миршоҳид Ҳасанбоевнинг финалдаги иштироки якунланди. Жаҳон чемпионати ғолиб ва совриндорлари билан баҳс олиб борган юртдошимизнинг чиқишини ҳакамлар 53.220 балл билан баҳолашди. Ушбу натижа орқали спортчимиз мусобақани тўртинчи поғонада якунлади.

16:45. Бокс бўйича Ўзбекистон эркаклар терма жамоаси аъзоси Абдумалик Халоков ярим финал йўлланмасини қўлга киритди. -57 кг вазн тоифасида иштирок этаётган ҳамюртимиз чорак финалда Токио-2020 Олимпиадаси финалчиси филиппинлик Карло Паламни мусобақадан чиқариб юборди ва ўзи учун шоҳсупадан жой нақд қилди.

17:00. Ҳозиргина Осиё ўйинларининг аёллар футболи мусобақасида ярим финал учрашуви якунланди. Унда Ўзбекистон терма жамоаси Шимолий Кореяга қарши баҳс олиб борди ва 0:8 ҳисобида имкониятни бой берди.

Ўзбекистон 0:8 КХДР

Голлар: Ҳонг Сонгок 9, Ким Кёнг-Ёнг 18, 47, 63, 83, 90+2, Ан Мёнгсонг 45 +2, Ри Ҳае-Ён 50

17:39. Енгил атлетика бўйича Ўзбекистон терма жамоаси аъзолари Сафина Садуллаева ҳамда Светлана Радзивил баландликка сакраш дастурида медаллар учун кураш олиб боришди. Қувонарлиси, олтин ва кумуш медаллар ҳар икки юртдошимизга насиб этди.

Садуллаева олтин, Радзивил эса кумуш медал соҳибига айланди. Кучли учликни қозоғистонлик Надежда Дубовитская якунлаб берди. Эътиборлиси, ғолиб ва совриндорлар бир хил 1.86 метр натижа қайд этишган. Шоҳсупдаги ўринлар уринишлар сонига қараб тақсимланди.

18:18. Баҳодир Жалоловнинг хитойлик боксчига қарши жанги бошланди.

18:21. Ҳамюртимиз Хитой вакили устидан муддатидан аввал ғалаба қозонди!

18:25. Осиё ўйинларининг финалига йўл олган боксчимиз Баҳодир Жалолов ярим финалдаги ғалабаси орқали Париж-2024 ХХХИИИ ёзги Олимпия ўйинларига ҳам йўлланмани қўлга киритди. Бу Жалолов учун фаолиятидаги учинчи Олимпиада йўлланмаси!

Бугун Ханчжоуда ўтаётган XIX Осиё ўйинларининг навбатдаги куни ҳам ортда қолди. Шу куни ўзбекистонлик спортчилар 3 та олтин, 1 та кумуш ва 3 та бронза, жами 7 та медалга сазовор бўлишди.

Олтин

Шоҳмурод Холмуродов, Нурислом Тўхтасин ўғли – каноэда эшкак эшиш

Ольга Забелинская – велоспорт

Сафина Саъдуллаева – енгил атлетика

Кумуш

Светлана Раздивил – енгил атлетика

Бронза

Шаҳризода Мавлонова, Арина Танатмишева, Екатерина Шубина, Юлия Борзова - байдаркада эшкак эшиш

Шоҳсанам Шерзодова ва Нилуфар Зокирова - каноэда эшкак эшиш

Нигина Ўктамова – бокс

Шу тариқа Ўзбекистон делегацияси ҳисобидаги медаллар сони 50 тага етди. Шундан 14 таси кумуш, 15 таси кумуш ва 21 таси бронза медалларидир. Делегациямиз умумжамоа ҳисобида ҳозирча кучли бешликда бормоқда.