Хавьер Мендес: "UFC Усмон Нурмагомедовга чемпионлик жангини беришдан қўрқади"

Россиялик Усмон Нурмагомедовнинг мураббийи Хавьер Мендес жангчининг UFC даги фаолияти қандай кечишини прогноз қилди.

"UFC га ўтсак, дарҳол чемпионлик жангига эга бўлишни хоҳлардик, аммо улар бизга буни ҳеч қачон бермайди, чунки агар биз чемпионни йўқ қилсак, промоушен обрўсига путур етади. Ҳа, UFC да кучли жангчилар кўпроқ, лекин дунёдаги биринчи рақамли жангчи уларда эмас. UFC нинг бизга титул имконини бериши ўз жонига қасд қилишидек гап.

Шунинг учун дарҳол Жастин Гэтжи билан тўқнашувни унутинг - бу содир бўлмайди. Шахсан мен Пэдди Пимблетт билан баҳсни кўришни истардим", - деди америкалик мутахассис "Submission Radio" га берган интервьюсида.

Эслатиб ўтамиз, Усмон Нурмагомедов охирги жангида биринчи раунддаёқ Арчи Колганни нокаутга учратди.