Хави “Барселона” ҳали янги футболчи сотиб олишни инкор этмади

"Барселона" бош мураббийи Хави Эрнандеснинг айтишича, "кўк-анорранглилар" ҳали таркибни янгилаш жараёнини тўхтатгани йўқ.

Молиявий муаммоларга қарамай, "Барселона" трансфер бозорини тарк этмаяпти. Балки август ойи охиригача “Камп Ноу” эгалари сафида яна янги футболчиларни кўришимиз мумкин.

“Таркибни кучайтириш масаласи? Таркибни кучайтириш устида ишлашда давом этишимиз кераклигини олдин ҳам айтгандим. Режаларимизни амалга ошириш учун ҳали 31 августгача вақтимиз бор”, - дея Хавининг сўзларини келтиради журналист Жерар Ромеро.

Маълумот ўрнида, “Барселона” бу йил Андреас Кристенсен, Френк Кесси, Рафинья Диас, Роберт Левандовски, Жюль Кунде каби футболчиларни ўз сафига қўшиб олди.