Xavi: "La Liga APL bilan bir xil darajada"

"Barselona" bosh murabbiyi Xavi Ernandes La Liganing 12-turi doirasida "Valensiya" ustidan qozonilgan g‘alaba (1:0) haqida fikr bildirdi.

"Juda muhim g‘alaba. Ayniqsa, so‘nggi daqiqada erishilgani yanada ajoyib.

Biz o‘yin davomida biroz asabiylashdik. Chempionlar ligasidagi natija baribir o‘z ta’sirini o‘tkazdi. Buni unutishga harakat qildik. Lekin oson emas.

Hozir EChLda Ispaniyadan faqat bitta jamoa qolgan. Menimcha, ispan futbolida hech qanday muammo yo‘q. La Liga APL bilan bir xil darajada, deb hisoblayman.

Jamoa bu g‘alabaga haqli edi. Futbolchilar juda ko‘p kuch sarflashdi va oxirgi soniyalarda taqdirlanishdi. Biroq avvalroq gol urishga haqli edik. 

Noqulaylik tufayli Kundeni almashtirdik. Umid qilamizki, unda jarohat yo‘q. Ammo u o‘zini noqulay his qilmoqda. Garsiya jarohat olmaganga o‘xshaydi. Erikda hammasi joyida, deb umid qilamiz", - dedi ispaniyalik mutaxassis.