Хебайнинг Ўзбекистонга қайтаётгани ростми? У нега Саудия клубидан кетди? Рубин интервьюда нималарни айтди?

Барчамизга яхши таниш бўлган, ўтган йили Суперлигамизни “ёндирган” албаниялик ҳужумчи Рубин Хебай мавзуси бугунги кунда яна чемпионатимизда кун тартибида бўлиб турибди.

Боиси, у тўп сураётган Саудия Арабистонининг “Ал-Оруба” жамоасини тарк этди. Буни эшитган Суперлига клубларимиз унга яна харидор бўлишмоқда.

Албатта, унинг “Ал-Оруба”дан кетиши биз учун бироз кутилмаган янгилик бўлди. Чунки у жамоаси билан юлдузлар лигасига йўл олганди. Лекин албаниялик ҳужумчи энди бошқа жамоада тўп суради.

Sports.uz журналисти вазиятга ойдинлик киритиш учун Хебай билан алоқага чиқди.

- Рубин, “Ол-Оруба” клубида ярим мавсум ўйнаб, сўнгра у ердан кетдингиз. Нима учун?

- Мен шартномамни икки томонлама келишувга кўра бекор қилдим.

- Саудия Арабистони чемпионатига кетаётганингиздан хурсанд эдингиз. Клубингиз билан юлдузлар лигасига чиқишни мақсад қилгандингиз ва бунга эришдингиз. Шундай пайтда “Ал-Оруба”дан кетиш аламли эмасми?

- Бу жуда ҳам ғалати бўлди. Клуб, мен ва агентим ўзаро гаплашдик ва кетишга қарор қилдик.

- Сизни Ўзбекистонда кутишаётганини биламан. Масалан, “Навбаҳор”га кўчиб ўтаётганингиз қанчалик рост?

- Билмайман. Ҳозирча келажагим борасида ҳеч қандай қарорга келганим йўқ. Кейинга кунларда албатта бу борада аниқ бир қарорга келсам керак.

- Собиқ жамоангиз – “Андижон”га қайтишни истамадингизми? Чунки сизни қайтариш ниятида эдилар.

- Айтиб ўтганимдек, нима бўлишини кўрамиз. Яқин кунлар барчасини ойдинлаштиради.

- Саудия Арабистони чемпионатида қолиш имкониятингиз қолмадими?

- Мен бу масалада ўйлаяпман. Албатта, менда аллақачон қатор таклифлар бор. Лекин бир неча кун кутмоқчиман. Қани, қандай воқеалар содир бўларкин!

- Яна Ўзбекистоннинг бошқа клубларидан ҳам таклифлар борми?

- Менга қизиқиш билдираётган кўплаб клублар бор. Аммо мен агентим ва оилам билан келгуси ҳаракатларим юзасидан маслаҳатлашишим керак.

Шуҳратбек Жўраев.