Xenderson: "Bu Keyn uchun saboq bo‘ladi"

Jordan Xenderson Angliya terma jamoasining JCh-2022 chorak finalida Frantsiyadan uchralgan mag‘lubiyatiga izoh berdi.

"Hozir barchasi haqida xulosa chiqarish qiyin, fikrlarimni to‘liq etkazib bera olmayman. O‘ylaymanki, biz bu o‘yinda borimizni berdik. 0:1 hisobida yutqazayotgan paytimiz hafsalamiz pir bo‘ldi, ammo xarakter ko‘rsatib, hisobni tenglashtirdik. Maydonga bor kuchimizni berdik, lekin, afsuski, bu biz uchun atalgan oqshom emas edi.

- Keynning penaltini aniq amalga oshira olmasligi haqida nima deya olasiz?

Xarri biz uchun qancha penalti tepganini yaxshi bilamiz. Bizning bu ergacha kelishimizda uning gollari katta rol o‘ynadi. Bu uning uchun saboq bo‘ladi, kelajakda uni yanada kuchliroq qiladi. Keyn jahon darajasidagi kuchli forvard va bizning munosib sardorimizdir. Keyn hali o‘z so‘zini aytadi", - dedi angliyalik yarim himoyachi ITV telekanaliga bergan intervyusida.