"Хетафе"га қарши баҳсни "Реал"нинг асосий футболчиси ўтказиб юборади (қайднома)

Мадриднинг “Реал” клуби Испания чемпионатининг 8-туридан ўрин олган “Хетафе”га қарши ўйин учун жамоанинг қайдномасини маълум қилди.

Мадридликлар рўйхатига ҳужумчи Карим Бензема киритилмаган. 34 ёшли франциялик футболчи жароҳати сабаб сентябрь ойида учта ўйинни ўтказиб юборган бўлса, октябрь ойида “Осасуна” ва “Шахтёр” билан иккита учрашувда тўлиқ ўйнади. Ҳозирча футболчи нега бу ўйинда иштирок эта олмаслиги очиқланмаган.

Жорий мавсумда Бензема барча турнирларда 8 та ўйин ўтказиб, ўз ҳисобига 4 та гол  ва 1 голли узатмани ёздириб қўйган.

"Хетафе" - "Реал" учрашуви 8 октябрь куни бўлиб ўтади ва Тошкент вақти билан соат 00.00да бошланади.