Холанд таклифни қабул қилмади

“Боруссия” раҳбарияти жамоанинг асосий тўпурари Эрлинг Холандни олиб қолиш мақсадида унга янги шартнома таклиф қилган эди.

Дортмундликлар агар ҳужумчи янги битимни имзоласа, унинг йиллик маошини 8 миллион евродан 15 миллион еврога кўтаришни режалаштираётган эди.

Манбаларнинг хабар беришича, Холанд клуб таклифини қабул қилмаган. Норвегиялик тўпурар ўз кучини қудратли клубларда синаб кўрмоқчи.

Холанднинг агенти Мино Райола бу ҳужумчини ўз сафига қўшиб олмоқчи бўлган жамоалар йилига 50 миллион евродан маош тўлашга тайёр туриши кераклигини таъкидлаган эди.

Табиийки, дортмундликлар ҳеч бир футболчига бунақа катта маош беролмайди. Шу боис,  Эрлинг Холанд ҳозирги клубидан бўлаётган ҳар қандай таклифга рад жавобини беради.