"Хоразм" нақд 11 нафар футболчини олди. Улар кимлар?

Про лига вакиллари ҳам янги бошланажак мавсум учун астойдил тайёргарлик кўришмоқда. 12 март санасидан у ерда ҳам чемпионат старт олади. Янги мавсумда про лигада 8 та клуб Суперлига йўлланмаси учун курашади. Уларнинг орасида доимгидек Урганчнинг “Хоразм” жамоаси ҳам бор.

Урганчликлар доимо про лигада етакчиларга жиддий муаммо туғдириб келадиган жамоа сифатида мухлисларнинг ёдида сақланиб қолган. Хўш, бу йил “Хоразм”да қандай ўзгаришлар амалга оширилмоқда? Бош мураббий Руслан Аҳмедов ва клуб раҳбарияти селекцияда фаоллик кўрсатишаётганини алоҳида эътироф этиш керак. Жумладан, ҳозирга қадар 11 нафар трансферни амалга оширишди. Бу битта тўлиқ таркиб дегани.

“Машъал” клубидан дарвозабон Машҳур Муҳаммаджонов “Хоразм”га таклиф қилинди. 1999 йилда туғилган посбон куни кечан урганчликлар билан шартнома имзолади. У 13-рақамни танлади.

“Қўқон-1912”да тўп сурган ҳимоячи Авазхон Маматхўжаев ҳам “Хоразм”га ўтди. 1995 йилда таваллуд топган футболчи янги клубида 2-рақам остида ўйнайди.

Навбатдаги трансфер “Шўртан” клубидан амалга оширилди. 1996 йилда тавваллуд топган Ҳожиакбар Юнусов ҳимоячи сифатида энди “Хоразм” таркибида ўйнайди. У 5-рақамни олди.

“Сўғдиёна”даги ўйинлари орқали мухлисларга бироз бўлса-да, танилган Абдужалил Маназаров “Хоразм”га кўчиб ўтди. У Жиззахдан кейин Қўқонда ўйнади ва охирги жамоаси “Металлург” эди. 26 ёшли ярим ҳимоячи “Хоразм”да 21-рақам остида тўп суради.

“Бухоро”дан иқтидорли ҳимоячи Фарруҳ Иброҳимов ҳам таклиф этилди. 1996 йилда туғилган футболчи эндиликда “Хоразм” учун ўйнайди. Унинг рақами – 80.

Навбатдаги трансфер “Навбаҳор-Фарм” жамоасидан бўлди. 2001 йилда таваллуд топган Шерзод Ғуломжонов яна собиқ клубига қайтди. Чунки у олдин ҳам “Хоразм” шарафини ҳимоя қилган. Ярим ҳимоячи урганчликлар сафида 6-рақамни олди.

Ҳужум чизиғини кучайтириш учун “Андижон”ни тарк этган Бобур Фарҳодов таклиф қилинди. 28 ёшли футболчи “Хоразм” билан шартнома тузди ва 77-рақамни танлади.

Яна бир трансфер Ойбек Нурматов бўлди. 1998 йилда таваллуд топган футболчининг охирги жамоаси “Қизилқум” эди. У урганчликлар таркибида 9-рақамда ўйнайди.

Қирғизистоннинг “Нефтчи” жамоасида тўп сурган ҳамюртимиз Сардор Теляков яна ўзимизнинг чемпионатга қайтди. “Хоразм” клуби унга таклиф билан чиқди ва томонлар ўзаро келишувга эришдилар. 30 ёшли ярим ҳимоячи  “Хоразм”да 10-рақамда тўп сурадиган бўлди.

Ҳужум чизиғига яна бир ўйинчи – Мўмин Мелиев ҳам таклиф қилинди. 1997 йилда туғилган футболчининг охирги клуби “Қўқон-1912” эди. У “Хоразм”да 11-рақамни олди.

“Хоразм”нинг яна бир янги ўйинчиси – Бобур Қосимов. 1993 йилда туғилган футболчи ўтган йили “Машъал” шарафини ҳимоя қилди.

Агар таркибда яна янги трансферлар рўй бериб қолса, бундан ажабланмаймиз. “Хоразм” эса шу тариқа таркибини кучайтиришда давом этяпти.