Yamal, Messidan emas Ronaldudan o‘rnak ol!

“Barselona”ning 17 yoshli yulduzi Lamin Yamalning agenti Jorje Mendesh o‘z mijozini faoliyatini shakllantirishda Krishtianu Ronaldudan o‘rnak olishga chaqirdi.

- Yamal hali juda yosh, jahonda birinchi raqamli futbolchi bo‘lish, katta muvaffaqiyat qozonish uchun oldinda butun kelajagi va imkoniyati bor.

Laminning va umuman barcha yosh futbolchilarning  muvaffaqiyatga erishishida Krishtianu Ronaldu ajoyib o‘rnak bo‘la oladi.

Ronaldu hali hech kim etolmagan darajaga chiqqan. Gollarining soni mingtaga yaqinlashib qoldi, undan ko‘p to‘p kiritgan o‘yinchi yo‘q.

Gol — har qanday jamoaning asl maqsadi. Lamin Ronalduga qarab, nafaqat maydonda, balki undan tashqarida ham o‘rnak olishi mumkin. Krishtianu qirqqa yaqinlashgan bo‘lsa ham, hamon raqobatga qodir. Bu ajoyib namuna, - dedi Jorje Mendesh.