Яна бир япон футболчиси фаолиятини премьер-лигада давом эттириши мумкин

Италиянинг “Милан” клуби ярим ҳимоячиси Кейсуке Хонда фаолиятини Англия премьер-лигасида давом эттириши мумкин.

Football Italia нашрининг маълум қилишича “Уотфорд” клуби “россонерилар”дан япониялик футболчини ижарага олишни режалаштирмоқда. Инглиз жамоаси бош мураббийи Вальтер Маццарининг фикрича 30 ёшли Хонда унинг жамоасини кучайтириши мумкин.

Маълумот учун, Хонда ушбу мавсум Италия А Сериясида бор йўғи 5та учрашувда майдонга тушган ҳолос. Аввалроқ эса Япония терма жамоаси аъзосига АҚШнинг "Сиэтл Саундерс" клуби ҳам жиддий қизиқиш билдираётгани ҳақида хабар берган эдик

Эслатиб ўтамиз, япониялик Шинжи Оказаки ҳам айни дамда премьер-лиганинг амалдаги чемпиони "Лестер" клуби шарафини ҳимоя қилмоқда.