Янги жамоага ўтган Шомуродов қандай фикр билдирди?

Элдор Шомуродов келаси мавсумни А Серия дебютанти – “Кальяри” сафида бошлайди. Бу трансфер амалда ҳал қилиб бўлинган.

Ўзбек ҳужумчиси бир йил ижара асосида тўп суради. Келаси ёзда “Кальяри” 9 миллион евро эвазига легионеримизни ўз сафига қўшиб олиши мумкин. Клуб раҳбарияти Элдор билан 1+3 кўрнишида шартнома имзолаган.

Бу агар Шомуродов “Кальяри” таркибидан муқим ўрин эгалласа ва клуб уни тўлиқ трансфер қилса, 2027 йилгача сардиниялик сафида тўп тепишини англатади.

Таниқли журналист жанлука Ди Марцио ўз сайтида Элдор Шомуродовнинг трансфер бўйича илк фикрини эълон қилди.

Журналист ҳамюртимиздан “Янги саргузаштларга тайёрмисан?”, деб сўради. Бу савол Элдор:

- Албатта тайёрман. Мен “Каляри”га келганимдан жуда хурсандман, - деб жавоб қайтарди.

Яна бир италиялик журналист Антонио Синус ҳам “Кальяри” бош мураббийи Клаудио Раньери Шомуродовни бир неча вариант орасидан танлаб олганини ёзди.

Маълумотларга қараганда, клуб мутасаддилари бош мураббий талабига кўра, 4-4-2 схемасига мос тушадиган ҳужумчилар рўйхатини таклиф қилган. Охир оқибат, Раньери олдида учта – “Реал” тарбияланувчиси Борха Майораль, Греция футболи вакили Анастасиос Доувикас ҳамда “Рома” бош мураббийи Жозе Моуриньо асосий таркибдан жой бермаётган Элдор Шомуродов варианти қолди.

Майораль 2022 йили “Рома”да Элдор Шомуродов билан бир пайтда фаолият юритган эди. Бироқ, ўша пайт Римдаги форвардлар билан рақобатда енгилгани боис, “бўрилар” сафини тарк этганди. Борха 2016 йили “Қироллик клуби” академияси – “Кастилья”дан “Реал”нинг асосий таркибига жалб қилинганидан бери муқим ўйинчига айлана олмаяпти.

26 ёшли марказий ҳужумчи ижара асосида “Вольфсбург”, “Леванте”, “Рома” ва “Хетафе” клублари шарафини ҳимоя қилиб келмоқда. Бир йил муқаддам “Хетафе” Майорални “Реал”дан 10 миллион еврога сотиб олди.

23 ёшли Анастасиос Доувикас 2021 йилнинг ёзида Грециядан Нидерландиянинг “Утрехт” жамоасига кўчиб ўтганидан кейин европалик скаутлар назарига тушди. Доувикас легионер сифатида Нидерландия чемпионатида олтмиш олтита учрашувда майдонга тушиб, рақиблар дарвозасини 28 маротаба ишғол қилган ва етти марта жамоадошларини голли пас билан таъминлагани қайд этилган.

Клаудио Раньери Элдор Шомуродовни танлагани бежиз эмас. Чунки ўзбек футболчиси уч йилдан бери А Серия жамоаларида ўйнаб келмоқда. Ҳамюртимиз Борха Майораль ва Анастасиос Доувикасга нисбатан Италия футболига яхшироқ мослашган.

Элдор Шомуродов А Сериядаги фаолияти давомида “Женоа”, “Рома” ҳамда “Специя” таркибида жами 80 та учрашув ўтказиб. Ўз ҳисобига 12 та гол ва олтита ассист муаллифи бўлган.

Италия футболи мутахассисларининг таъкидлашича, Клаудио  Раньери келаси мавсум ҳужум чизиғида Жанлука Лападула ва Элдор Шомуродов тандеминидан фойдаланишга қарор қилган.

“Кальяри” футболчилари Италиянинг Валле д'Аоста минтақасида ўқув-машғулот йиғинларини бошламоқда. Тайёргарлик жараёни 4 августга қадар давом этади.

Ўзбек футболчиси “Манчестер Сити”ни ҳам қизиқтириб қўйди...

“Ланс” нега айнан Ҳусановни трансфер қилди?

Ҳусановни “Ланс” раҳбарияти ва мухлислари қандай қарши олди?

Президент Шомуродов трансферини тасдиқлади!