Янги мавсумда Англиянинг нечта клуби ЕЧЛда иштирок этади?

"Манчестер Сити" АПЛда ғалаба қозонганидан кейин автоматик тарзда Чемпионлар лигасига йўлланмани қўлга киритди. Аммо "Челси"га қарши Чемпионлар лигаси финалида муваффақият қозонган тақдирда, Премьер-лиганинг бешинчи жамоаси 2020/21 келаси йил асосий еврокубокда иштирок этиши мумкин эди. Аммо нега инглиз клублари жорий мавсум УЕФАдан қўшимча квота ололмайди? Ҳозир шу масалада тушунча беришга ҳаракат қиламиз.

29 май куни “Манчестер Сити” ва “Челси” ЕЧЛ финалида ўзаро майдонга тушади. Айтиш керакки, бу Чемпионлар лигасида сўнгги 3 йил ичидаги иккинчи инглизча финал бўлади. Боиси, 2019 йилда ушбу мусобақанинг ҳал қилувчи баҳсида “Ливерпуль” ва “Тоттенхэм” жамоалари ўзаро майдонга тушган эди.

“Манчестер Сити” жорий мавсум АПЛда ғолиб бўлди ва бу ишни сўнгги 4 йил ичида 3-марта амалга оширди. Хосеп Гвардиола жамоаси аллақачон Чемпионлар лигасининг келаси мавсуми учун йўлланмани нақд қилиб қўйган, аммо ЕЧЛдаги ғалаба ҳам ушбу мусобақанинг янги мавсуми учун йўлланма тақдим этишини унутиб бўлмайди.

Шу ўринда бир савол туғилади, Чемпионлар лигаси финалига чиққан “Манчестер Сити” ҳам, “Челси” ҳам, Европа лигаси финалида иштирок этадиган “Манчестер Юнайтед” ҳам АПЛда мавсумни кучли тўртликда якунлаган бўлса ва ўзлари учун ЕЧЛ йўлланмасини нақд қилиб қўйган бўлса, у ҳолда уларнинг ғолиблиги учун бериладиган йўлланма премьер-лиганинг қайси жамоасига берилади?

Жавоб – йўқ! Чунки “Сити” йўлланмани қўлга киритган бўлса ҳам, “Челси” мавсумни 4-ўринда якунлади ва “аристократлар” ЕЧЛ гуруҳ босқичига плей-офф орқали йўлланмани қўлга киритишлари мумкин. Томас Тухель шогирдлари назарий жиҳатдан 100 фоиз ЕЧЛ йўлланмасини нақд қилиб улгурмаган.

Худди шундай вазият роппа-роса 9 йил муқаддам содир бўлган. 2011/12 йилги мавсумда “Челси” премьер-лигада мавсумни 6-ўринда якунлаган. Бироқ Лондон клуби бош мураббийни ўз вақтида алмаштириш натижасида, Роберто ди Маттео қўл остида ўз тарихида ягона бўлиб турган ЕЧЛ ғолиблигини қўлга киритган. Шундан сўнг мавсумни 4-ўринда якунлаган Харри Реднапп бошчилигидаги “Тоттенхэм” ўзининг ЕЧЛдаги ўрнини “аристократлар”га бўшатиб берган.

Эътиборлиси, Чемпионлар лигасида ғолиб бўлган жамоага янги мавсумда иштирок этиш ҳуқуқини бериш қоидаси ҳам айнан инглиз жамоалари туфайли қабул қилинган. 2005 йилда “Ливерпуль” “Милан”га қарши ўтган Истанбулдаги финалда даҳшатли камбэкни амалга оширган ва мусобақа ғолибига айланган. Аммо мерсисайдликлар ўша мавсум АПЛда 5-ўринни эгаллашган ва ЕЧЛ йўлланмасидан қуруқ қолишган.

Кейин УЕФА махсус рухсатнома билан “Ливерпуль”ни Чемпионлар лигасининг 2005/06 йилги мавсумига қўйди. Бироқ “Ливерпуль” мусобақани энг биринчи саралаш босқичидан бошлади. Мерсисайдликлар учун еврокубоклардаги мавсум июль ойидан бошланди. Улар дастлаб Уэльснинг ТНС ҳамда Литванинг “Каунас” клуби тўсиғидан ўтишади. Ниҳоят 3-саралаш раундида Болгариянинг ЦСКА клубини мағлубиятга учратиб, гуруҳ босқичи йўлланмаси қўлга киритишади ва ЕЧЛдаги 5-инглиз клубига айланишади. Лекин ўша мавсум 4-ўринни қўлга киритган “Эвертон” саралаш босқичида “Вильярреал”га имкониятни бой берган ва натижада барибир гуруҳ босқичида Англиядан 4 та клуб иштирок этган.

УЕФА қоидасига кўра, ЕЧЛ ёки Европа лигасида ғолиб бўлган жамоа ўз миллий чемпионатида Чемпионлар лигаси йўлланмасини берадиган ўринни эгаллай олмаган тақдирдагина, уларга истисно тариқасида ЕЧЛда иштирок этиш ҳуқуқи берилади.

Бироқ энди вазият бошқача. Чемпионлар лигаси финалида иштирок этадиган иккала жамоа ҳам, Европа лигаси ғолиблиги остонасида турган “Манчестер Юнайтед” ҳам аллақачон мавсумни кучли тўртликда якунлаб бўлди. Шу сабабли уларнинг еврокубоклардаги ғалабаси ҳам АПЛда 5-ўринни эгаллаган “Лестер”нинг Чемпионлар лигаси йўлланмасига эга бўлишига ёрдам бермайди. “Тулкилар” бу мавсум Европа лигасида ўз омадларини синаб кўришга мажбур.