Йигирма ёшли футболчи учун юз миллион евро тикишяпти

«Тоттенхэм» ёзги трансфер ойнасида «Борнмут»нинг ёш юлдузи Эли Крупини қўлга киритишга жиддий бел боғлагани айтилмоқда. TEAMtalk нашрининг ёзишича, 20 ёшли ҳужумчи учун курашда лондонликлар имкониятлари ошган, чунки аввалдан асосий даъвогарлардан бири бўлган ПСЖ эътиборини «Барселона» форварди Ферран Торресга қаратган.

Манбага кўра, «Тоттенхэм» яқин кунлар ичида «Борнмут»га француз футболчиси учун тахминан 100 миллион евро атрофида таклиф юборишни режалаштирмоқда. Эли Крупининг ўзи ҳам янги жамоага ўтишга тайёр экани қайд этилмоқда.

Аввалроқ тарқалган хабарларда ёзилишича, ёш ҳужумчи «Тоттенхэм»ни мавсум охирида клубни қабул қилиб олган Роберто Де Дзерби қўл остида ўйнаш истаги туфайли ҳам танламоқда. Итальян мутахассиснинг ҳужумкор услуби Крупининг қарорини янада мустаҳкамлаётгани таъкидланади.

Шу билан бирга, футболчига бўлган қизиқиш фақат «Тоттенҳэм» билан чекланиб қолмаяпти. Эли Крупини «Арсенал», «Манчестер Сити» ва «Бавария» ҳам кузатиб бормоқда. Хусусан, мюнхенликлар ҳужумчининг ўйинларини фаол равишда таҳлил қилаётгани айтилмоқда.

Ўтган мавсумда Эли Крупи «Борнмут» таркибида 35 учрашувда майдонга тушиб, 13 та гол урди. Transfermarkt портали баҳосига кўра, унинг бозор қиймати 70 миллион еврони ташкил этади. Футболчининг клуб билан амалдаги шартномаси 2030 йил ёзигача мўлжалланган.