Йўқотишларсиз бораётган "Нефтчи" ОКМКни Фарғонада қачон ютганди ёхуд Фарғонада супер ўйин олдидан яна аншлаг

ФИФА кунлари муносабати билан терма жамоамиз Саудия Арабистонида йиғин ўтказиб, иккита ўртоқлик учрашувида майдонга тушганини биласиз. Шу боисдан Суперлигамизда вақтинчалик танаффус юз берганди. Энди яна чемпионатимиз баҳслари давом эттирилади. 31 март кунидан 3 апрелга қадар Суперлиганинг 4-тур учрашувилари ўтказилади. Таъкидлаш лозимки, мазкур турнинг марказий учрашуви Фарғонада “Нефтчи” ҳамда ОКМК ўртасида бўлиб ўтиши аниқ.

Бир-бирига ўхшаш жамоалар, таркиб масаласида ҳам тенглик дейиш мумкин. Фақат “Нефтчи”да 3 та ўйиндан сўнг 3 та ғалаба бўлса, ОКМКда 3 та учрашувда 2 ғалаба билан 1 мағлубият бор. Мусобақа жадвалида “Нефтчи” ҳаммадан кўра энг яхши натижа қайд этиб пешқадамликни қўлига олган. 3 та учрашувда рақиблар дарвозасига 7 та гол урди ва ўз дарвозасидан фақат 1 та тўп олиб чиқди. ОКМК бўлса 6 очко билан 4-ўринда. Тўплар нисбати 6/4.

Охирги пайтларда “Нефтчи” тез-тез тилга олиняпти. Айниқса, Фарғонада “Пахтакор” устидан ғалаба қозониши фонида кўпчилик яна аввалги “Нефтчи” тикланаётганига жиддий ишона бошлади. Бош мураббий Виталий Левченко футболчиларини ўйинларга қандай тайёрлашни билади. Тан олиш керакки, ушбу мураббий “Нефтчи”да иш бошлагач, фарғоналикларнинг ўйини анча жозибадор, тажовузкор кўрина бошлади. Бу эса натижаларда ҳам ўз аксини топяпти.

Бевосита “Нефтчи” – ОКМК жамоаларининг ўзаро ўйинлари тарихига келадиган бўлсак, шу кунгача чемпионат доирасида 26 та учрашув ўтказилган. Шундан 12 тасида фарғоналикларнинг қўли баланд келган. ОКМК эса 8 та беллашувда ғолиб чиққан. Жамоалар 6 та баҳсда дуранг натижага рози бўлишган. Тўплар нисбатида ушбу клубларни 10 та тўп фарқи ажратиб турибди. Яъни, “Нефтчи” 45 та, ОКМК 35 та гол урган. Охирги марта мазкур клублар Фарғонадаги “Истиқлол” стадионида тўқнаш келишганди. Ўшанда ОКМК “Нефтчи” майдонида 1:3 ҳисобида ғалаба қозониб кетганди. Биринчи даврада ОКМК мезбонлиги остида ўтган ўйинда ҳам фарғоналиклар 3:1 ҳисобида мағлуб бўлган. “Нефтчи” ОКМКни сўнгги бор 2018 йили сафарда ягона урилган гол эвазига ютган. Фарғонадаги ўйинларда “Нефтчи” ушбу рақибини қачон ютганини биласизми? Бунга ҳам 7 йил бўлди. 2016 йилнинг иккинчи даврасидаги баҳсда “Нефтчи” ўз майдонида 3:1 ҳисоби билан устунликка эришганди.

Кўриб турганингиздек, сўнгги пайтларда “Нефтчи”нинг ўз майдонида олмалиқликларга қарши учрашуви анча мураккаб кечмоқда ва таъбир жоиз бўлса, ноқулай рақибга айланмоқда. Ҳолбуки, статистика бўйича фарғоналиклар Олмалиқдаги баҳсларда ютиб келган пайтларини кўряпмиз. “Нефтчи” мезбонлиги остида ўтган охирги 4 та ўйинда эса ОКМК ё дуранг ўйнаган ё ютиб кетган. Бу сафаргиси қандай бўларкин?

“Нефтчи”нинг бу йилги шашти анча баланд-а? Жамоа ўз ўйини ва натижалари билан мухлисларини яна “Истиқлол” стадионига қайтара олаётгани қувонарли. Бунга Фарғонада “Пахтакор”га қарши учрашувда ҳам гувоҳ бўлдик. ОКМК билан ўтказиладиган беллашувда яна “Истиқлол” стадионида аншлаг бўлиши катта эҳтимол. Ахир фарғоналик мухлисларнинг суюкли жамоаси турнир жадвалида пешқадамликни қўлига олган.

Чиндан Фарғонада яхши, томошабоп ўйин бўлади. ОКМКни характери бор. Иккала жамоа сафида юқори савияли ижрочилар жамланган. Энг асосий гап бош мураббийларда. Виталий Левченко ҳамда Миржалол Қосимов бир-бирини яхши биладилар. Қизиғи, бу икки мутахассис Осиё Чемпионлар лигаси майдонида ҳам рўбаро келганлар. Ўшанда Левченко Тожикистоннинг “Истиқлол” клуби бош мураббийи эди. Қосимов олмалиқликлар устози сифатида ОЧЛ гуруҳ босқичида айнан “Истиқлол” билан куч синашган. 2021 йилнинг 18 апрель санасида 2-тур доирасида ушбу жамоалар тўқнаш келишган ва унда “Истиқлол” 3:2 ҳисобида ғалаба қозонгани ёдимизда. Ўтган йилнинг иккинчи даврасидаги тўқнашувда эса Левченко Қосимовга ютқазган. “Нефтчи” устози ҳали Суперлигада ОКМКни мағлуб эта олгани йўқ.

Эслатиб ўтамиз, “Нефтчи” – ОКМК ўртасидаги ўйин 31 март куни, соат 18:00 да бошланади.

Шуҳратбек Жўраев.