Юлдуз бўлсанг ўзингга! “Реал” футболчилари Мбаппедан қаттиқ норози

“Реал” ўйинчилари орасида Килиан Мбаппенинг ўйин услуби ва майдондаги ҳаракатларига эътироз билдираётганлар кўпайиб бормоқда.

Relevo нашрининг маълум қилишича, футболчилар орасида норозилик келиб чиқишига франциялик ҳужумчининг ўйинларда ортга қайтмаётгани ва ҳимояланишга ёрдам бермаётгани сабаб бўлмоқда.

Хусусан, “Барселона”га қарши учрашувда Мбаппе атиги саккиз километр югурди. Жамоадошлари бунга эътибор қаратди ва бу масалани  муҳокама қила бошлади.

Килианнинг ҳимояга кўмаклашмагани ортидан бошқа футболчиларнинг иши кўпайиб бормоқда. Хусусан, энг катта оғирлик Жуд Беллингемга тушяпти. Статистик таҳлиллар Мбаппе ортга қайтмагани учун Беллингем унинг ўрнини ёпишга ҳаракат қилмоқда ва англиялик футболчининг бир ўйинда босиб ўтган масофаси сезиларли даражада ортганини кўрсатяпти.

Жамоадагилар Килиан ўзига нисбатан танқидий қарашини ва ҳимояга ёрдам бериш ҳам муҳим аҳамият касб этишини тушуниб етишини исташмоқда.