Юлдузларга эркинлик! Катта жамоаларда “ўзини ёмон ҳис қилаётган” юлдузлар

Қишки трансфер ойнасининг охирги кунларида спорт нашрлари Гарет Бэйл бир оёғи билан “Тоттенхэм”да эканлигини бот-бот ёзишди. Бир томондан, бу оддий ҳолдек – ҳар трансфер ойнасида журналистлар Бейлни АПЛга “ўтказишади”. Бошқа томондан, бу сафар футболчи ростдан ҳам Мадриддан кетиши мумкин эди.

Трансфер ойнаси ёпилганига анча бўлди. Аммо нашрлар бу миш-мишлар бекорга чиқмагани ҳақида ёзишмоқда. Ҳатто, Дэниел Леви ва Жозе Моуриньо трансфер борасида норасмий келишувлар олиб борган деган хабарлар мавжуд.

Кўплаб футболчилар худди шу ҳолатда. Гарет Бэйл дунёнинг энг кучли жамоаларидан бирида тўп сурса-да, бу ерга ўзи хоҳлаб келмаганлиги аён бўлади. У кетишни хоҳларди, лекин уни ўз жамоасига қўшиб олишни хоҳловчилар ва бунга қурби етадиганлар кам топилади. Худди шундай ўзи истамаган ҳолда жамоага келиб қўшилганлар анчани ташкил этади: Алексис Санчес, Месут Ўзил, Филиппе Коутиньо, ва Пол Погба. Неймарни ҳам шу рўйхатга киритиш мумкин. Улар ҳақида батафсил гаплашамиз.

Неймар

Жарангдор трансферни хоҳлаб, унга эришиш учун қўлидан келган ҳамма нарсани қилиб, хато қилгач, хатосини тан олган футболчи ким деса, Неймарни кўрсатаверинг. Ҳозир Неймар хоҳлайдиган энг катта нарса – ортга қайтиш.

Бразилиялик ҳужумчи “ПСЖ”га 222 млн еврога ўтган эди. Ўтган йили эса француз клуби раҳбариятидан ўзини “Барселона”га трансфер қилишларини сўради. Қатарлик хўжайинларга ҳам доимий можаролар чиқариб юрадиган футболчи керак эмасди ва уни сотишга қаршилик қилишмади. Аммо трансфер нархи камида 200 млн еврони ташкил этиши шарт эди.

“Барса”да шунча пул бор эди. Лекин Антуан Гризманн трансферидан сўнг буджет сезиларли даражада камайди. Неймар эса қайтишни шу қадар хоҳлардики, ҳатто трансферининг 20 млн евросини ўзи тўламоқчи бўлди. Аммо бу трансфер амалга ошмади.

Шунга қарамасдан бразилиялик футболчи учун мавсум ёмон ўтмаяпти. 18 та ўйинда 15 та гол ва 10 та голли узатмани ўз ҳисобига ёздириб қўйди. Балки, яқин орада у қайтар, лекин ҳозирча у парижликлар футболчиси.

Пол Погба

Ақлбовар қилмас истеъдодга эга бўлган Пол Погба “Манчестер Юнайтед”нинг етакчиси бўлиши кутилган эди. Аммо ундай бўлмади. У ҳозир жамоада ўзини бахтсиз ҳис этяпти ва тезроқ Англиядан кетишни хоҳлаяпти. У жуда ақлли футболчи. Ўзининг истаклари борасида ҳеч қачон гапирмаган. Доим жим бўлишни маъқул кўради. Унинг номидан агенти Мино Райола гапиради. Шуниси аниқки, Погба жамоадан кетишни истайди.

Неймардан фарқли равишда, Погбанинг “Юнайтед”га фойдаси тегмаяпти. Мухлислар уни жамоанинг етакчи футболчиси бўлишини хоҳлайди, аммо Полнинг доимий жароҳатлари, беқарор ўйинлари бунга халақит қилади. У кета оладими? Албатта. Хабарларга кўра, “Реал” футболчи учун 100 млн фунт тўлашга рози. Бу икки томонни ҳам қониқтира оладиган нарх.

Филиппе Коутиньо

Филиппе “Барселона”да ўз ўйинини топа олмади. Каталония жамоаси уни “Бавария”га ижарага бериб юборди. Мюнхенда эса Коутиньо аста-секин ўзини кўрсатяпти. Тўғри, “Ливерпуль”даги Коутиньо даражасига чиқа олгани йўқ, аммо “Барса”дагидек йўқолиб қолгани ҳам йўқ.

Филиппе “Барселона”га қайтиш вариантини кўриб чиқаётгани йўқ. Аммо эхпресс нашри мухбири Нил Фисслер сўзларига кўра, Каталония жамоаси бразилиялик футболчини камида 77 млн фунт тўлаган жамоага сотиб юбориши мумкин.

Алексис Санчес

Санчеснинг ижара асосида “Интер”га ўтганини эшитган манчестерликлар енгил нафас ола бошлашди. Мухлислар ҳам, футболчининг ўзи ҳам “Олд Траффорд”да ундан ҳеч нима кутишмаётганини тушуниб туришган эди. Иккала томон ҳам трансфер амалга ошмаслигини тушуниб туришибди. Чунки Санчеснинг талаблари жуда юқори ва уни устига Миланда у алмаштириб бўлмас футболчи даражасига етмади.

Сульшернинг гаплари эса барчани ҳайрон қолдирди: “Санчес ёзда “Манчестер”га қайтади ва ҳаммага улар нотўғри фикрда эканликларини кўрсатиб қўяди.”

Норвегиялик мутахассиснинг сўзларига қарамасдан, “МЮ” футболчини сотиб юбориш истагида.

Месут Ўзил

Ўзил Лондонни тарк этишга шошилмаяпти. Ишончли нашрлар хабарига кўра, ярим ҳимоячи ҳозирги аҳволидан рози ва у жамоани яхши кўради. Яқин орада Месут ўз формасини тиклайди ва жамоага ёрдам бера бошлайди.

“Арсенал” эса бундай деб ҳисобламайди. Немис футболчисига таклифлар деярли йўқ. АПЛнинг бирорта жамоаси уни сотиб олиш учун таклиф билдирмади. Асосан Туркия ва АҚШ жамоалари Месутга қизиқиш билдиришди.

Ўзил катта эҳтимол билан МЛСга ўтиб кетиши мумкин. У билан аллақачон “Ди Си Юнайтед” вакиллари алоқага чиққанлиги ҳақида манбалар бор.

Артета ҳам Месутни юқори формасига қайтара олиши ҳақида гапирган эди, аммо ҳозирча ўзгариш йўқ.

Матнда хатолик топсангиз, ўша хатони белгилаб, бизга жўнатинг (Ctrl + Enter)