Юрген Клопп Арнольдга нисбатан бўлган ҳуштакбозликдан ранжигани ҳақида гапирди

АПЛ доирасида бўлиб ўтган "Ливерпуль" – "Арсенал" (2:2) учрашувида клуб тарбияланувчиси Трент Александер-Арнольд мухлислар томонидан ҳуштакбозлик билан кутиб олинди. Аввалроқ, футболчи мавсум якунлангандан сўнг жамоани тарк этиб, эркин агентга айланишини маълум қилган эди. Ушбу вазият ҳақида мерсесайдликларнинг собиқ мураббийи Юрген Клопп ўз фикрлари билан ўртоқлашди:

"Мен ўша ўйинни кўрганман. У майдонга тушганида ҳуштак эшитдим. Мен энди қариб қолганман, шунинг учун бундай ўйладим: "Эҳтимол, эшитишим нотўғридир". Шунда овозни баландлатдим ва ўйладим: "Йўқ, бу ҳақиқатан ҳам ҳуштак".

Тушуниш учун яна 10 сония керак бўлди. Кейин телевизорни ўчирдим. Бу воқеа мени ранжитди.

Мен мухлислар ҳафсаласи пир бўлмаслиги керак демаяпман. Мен шунчаки айтаяпман: "Унутманглар". Бу клуб ҳеч нарсани унутмайди. Биз яхши нарсани ҳам, ёмонини ҳам эслаб қоламиз. Лекин ёмонини инкор қиламиз, яхшисини хотирамизда сақлаймиз.

У кетяпти, шундан хурсанд бўлиш шарт эмас. Лекин у клуб учун нималар қилганини унутманглар. Мен эса ҳеч қачон унутмайман" – деди германиялик мутахассис.

Эслатиб ўтамиз, англиялик ҳимоячи жамоани тарк этганидан сўнг Мадриднинг "Реал" клубига кўчиб ўтиши кутилмоқда.