"Ювентус" 18 та голга ассистентлик қилган футболчи билан шартномани узайтирмоқчи

"Ювентус" раҳбарияти жамоанинг қанот ярим ҳимоячиси Хуан Куадрадо билан амалдаги шартномани узайтиришни режалаштирмоқда.

Италиялик журналист Николо Скиранинг хабар беришича, "кекса синьора" 32 ёшли колумбиялик футболчига 2023 йилгача бўлган янги шартнома таклиф қилмоқчи. Томонлар ўртасидаги амалдаги келишув эса 2022 йилга қадар имзоланган.

Куадрадо жорий мавсум "Ювентус" сафида 33 та ўйинда майдонга тушди. У ушбу учрашувларда жамоасининг 18 та голига ассистентлик қилди.

“Ювентус” 32 турдан сўнг А Серия мусобақа жадвалида 65 очко билан 3-ўринда бормоқда. Андре Пирло жамоаси пешқадам “Интер”дан 11 очкога ортда қолмоқда.