“Ювентус” афсонаси Спалетти жамоасига баҳо берди

“Ювентус”нинг собиқ ҳимоячиси Морено Торриcелли клубнинг ҳозирги ва ўз давридаги барча совринларни қўлга киритган “Кекса сениора”ҳақида гапирди. Собиқ футболчи “Радио Бианcонера”га берган интервьюсида бир қатор қизиқарли фикрларни билдирди.

“Ювентус” Чемпионлар лигасига чиқадими?

“Умид қиламанки, ҳа. Жамоада мавсумдаги минимал мақсад – Чемпионлар лигаси йўлланмасини қўлга киритиш.

Албатта, бунга эришиш учун сўнгги тургача курашишга тўғри келади. Аммо сифат жиҳатидан қарасак, биз яхши натижа кўрсатишимиз мумкин. Чемпионлар лигасига чиқиш жуда муҳим.”

Спаллетти жамоани қандай бошқармоқда?

“Тюрам гол ургандан кейин Спаллетти билан бўлган ўша қучоқлашув жуда муҳим сигнал эди. Бу жамоа ичида бирлик ва яхши муҳит борлигини кўрсатади. Спаллетти келганидан бери “Ювентус” ўз ўйинини янги босқичга олиб чиқди ва фақат бир-икки ўйинда қоқилди. Энг муҳими – жамоа яна мухлисларни орзу қилишга ундаяпти. Бирлик ва жамоавийлик ҳар доим фарқни яратади. Қийин вазиятларда футболчилар бир-бирига ёрдам бериши керак. Бу менга Чемпионлар лигаси йўлланмаси учун умид беради.”

1996-йилги Чемпионлар лигаси ҳақида

“Биз ҳамма совринларни ютган жамоанинг бир қисми бўлганимиз учун, табиийки, мухлислар хотирасида алоҳида ўрин эгаллаймиз. Бу биз учун катта фахр. Фақат мен эмас, балки ўша жамоанинг барча футболчилари бундан ғурурланади. Ҳатто бизда “Champions 96” деган чат гуруҳ ҳам бор — у ерда ҳазиллашамиз, суҳбатлашамиз, бир-биримиздан ҳол-аҳвол сўраймиз. “Ювентус” каби буюк клуб тарихининг бир қисмига айланиш — бу жуда катта ютуқ”, - деди собиқ футболчи.

Торриcелли 1992–1998 йилларда “Ювентус” сафида тўп сурган. У бу даврда 230 та ўйин ўтказиб, 3 та гол урган. Шунингдек, жамоа билан бирга 3 та Скудетто, 1 та Италия кубоги, 2 та Италия Суперкубоги, 1 та Чемпионлар лигаси, 1 та Қитъалараро кубок, 1 та УEФА Суперкубоги ва 1 та УEФА кубогини қўлга киритган.

Одилов Миржалол