"Ювентус" бош мураббийини ишдан бўшатди, жамоага вақтинча Брамбилла раҳбарлик қилади

26 октябрь, якшанба куни "Ювентус" А Сериянинг 10-турида "Лацио"га 0:1 ҳисобида мағлуб бўлди. Бу мағлубият туринликлар учун барча мусобақалардаги кетма-кет учинчиси бўлди.

Фабрицио Романонинг маълум қилишича, клуб раҳбарияти Игор Тудорни қониқарсиз натижалар сабаб ишдан бўшатди.

"Gazzetta dello Sport"нинг ёзишича, "Ювентус" бош мураббийлиги учун номзодлар рўйхатига қуйидаги мутахассислар киритилган:

Роберто Манчини

Лучано Спаллетти

Раффаэле Палладино

Тьягу Мотта — у етти ой аввал "Ювентус"дан ҳайдалган эди.

Роберто Манчини ҳозирда ишсиз. У 2024 йил октябрида Саудия Арабистони терма жамоаси бош мураббийлиги лавозимини тарк этган. Манчини илгари "Лацио", "Фиорентина", "Интер", "Галатасарай" ва "Манчестер Сити"да фаолият юритган. Шунингдек, у Италия терма жамоаси билан Евро–2021 ғолиби бўлган.

Эслатиб ўтамиз, Тьягу Мотта 2024 йил июнидан 2025 йил мартигача "Ювентус"да ишлаган, клуб ҳали ҳам унга ишдан бўшатилгани учун компенсация тўламаган.

Ҳозирда "Ювентус" А Серия жадвалида 12 очко билан саккизинчи ўринни эгаллаб турибди. Чемпионлар лигасида эса икки очко тўплаб, 25-поғонада жойлашган.

Келаси ўйинларда жамоага вақтинча Массимо Брамбилла раҳбарлик қилади.