“Ювентус” Италиянинг энг зўр дарвозабонини оляпти

“Ювентус” раҳбарияти ашаддий рақиби – “Милан”нинг асосий дарвозабони Жанлуижи Доннарумма билан шахсий шартнома бўйича келишувга эришгани хабар қилинмоқда.

Ҳали ёш бўлишига қарамай, Италиянинг энг кучли дарвозабонига айланган Доннарумма миланликлар билан янги битим бўйича келишувга эриша олмади. Айниқроғи, “Милан” ўз посбонининг маош ва шартнома муддати бўйича талабларига кўнмади.

“Ювентус” билан келишувга кўра, Доннарумма Туринга эркин агент сифатида бепул келади ва йилига 9,5 миллион евро маош олади. Бу трансфер амалга ошса, футболчининг агенти Мино Райолага 20 миллион евро миқдорида комиссия пули тўланади.

Туринликлар Доннарумма келиши билан Жанлуижи Буффон ва асосий голкипер Войцех Шченсни билан хайрлашади. Буффон ўзига А Сериядан жамоа қидираётган бўлса, польшалик посбонни “Тоттенхэм”да кутишмоқда.

Матнда хатолик топсангиз, ўша хатони белгилаб, бизга жўнатинг (Ctrl + Enter)