“Ювентус” Роналду бўйича сўнгги қарорини эълон қилди

“Ювентус” спорт директори Фабио Паратичи жамоа тўпурари Криштиану Роналдунинг келажаги бўйича бир қарорга келинганини маълум қилди.

Аввалроқ, жамоа Европа Чемпионлар лигасини эрта тарк этгани учун клуб раҳбарияти йилига 31 миллион евро маош олаётган Роналдуниёзда трансфер қилиб, португалиялик ҳужумчи учун сарф қилинган маблағларнинг муайян қисмини қайтаришни режалаштираётгани ҳақида хабарлар тарқатилаётган эди.

Бироқ, вақт ўтиши билан клуб хўжайинларининг қарори ўзгарди.

- Биз Криштиану Роналдуни жамоада сақлаб қолишга қарор қилдик. У дунёдаги энг яхши футболчи ва жамоа унинг атрофида жипслашган. “Ювентус” ўтган йилдан бошлаб янги лойиҳани ҳаётга тадбиқ этмоқда. Битта ўйин бизнинг стратегиямиз ва мақсадларимизни ўзгартириб юбормаслиги керак. Биз ҳозирга қадар амалга оширган ишларимиздан фахрланамиз. Жамоани янада такомиллаштириш мақсадида бошланган ҳаракатларни давом эттирамиз, - деди Фабио Паратичи.

Криштиану Роналдунинг кетиши ҳақидаги хабарлар тарқатилганидан кейин унга “Интер Майами”, ПСЖ, “Реал”, “Манчестер Юнайтед” каби суперклублар харидор бўлаётган эди.

Матнда хатолик топсангиз, ўша хатони белгилаб, бизга жўнатинг (Ctrl + Enter)