Забитцер "Манчестер Юнайтед"да қачон дебют қилиши маълум

"Манчестер Юнайтед"нинг "Бавария"дан харид қилган ярим ҳимоячиси Марсель Забитцернинг дебют учрашувини қачон ўтказиши аниқ бўлди.

Австриялик футболчи манкуниаликлар сафида эртага, шанба куни Англия премьер-лигасининг 21-туридан ўрин олган "Кристал Пэлас"га қарши ўйинида дебют қилади. Бу ҳақда "қизил иблислар" бош мураббийи Эрик тен Хаг маълум қилди.

"Забитцер "Кристал Пэлас"га қарши ўйнайдими? Ҳа. У бор-йўғи битта машғулот ўтказди, лекин биз унинг жуда яхши футболчи эканини аллақачон кўрганмиз, биламиз. Мен бунга шубҳа қилмайман, чунки у "Бавария"дан келган.

Немис клубларида жисмоний тайёргарлик доимо юқори туради, шунинг учун у ўйнашга тайёр, деб ўйлайман. У ўз ишини қандай бажаришни биладиган жуда ақлли футболчи", — деди Тен Хаг журналистларга.

Эслатиб ўтамиз, 28 ёшли футболчи Мюнхен клубидан "Манчестер Юнайтед" клубига ижара асосида келиб қўшилди.