Зидан "Реал"га қайтадими?

Мадриднинг “Реал” клуби Зинедин Зиданни бош мураббийликка қайтариш ниятида эмас.

Олдинроқ Зидан "Реал"га қайтиш бўйича музокаралар олиб бораётгани ҳақида хабар берилганди.

"Маrcа" нашри хабарига кўра, "қироллик клуби" Зиданни қайтариш ниятида эмас. Клуб раҳбарияти Карло Анчелоттига ишонади ва кейинги мавсумни режалаштиришда у билан маслаҳатлашади.

Анчелотти ва Флорентино Перес ўртасидаги муносабатлар италиялик мутахассиснинг "Реал" Мадриддаги фаолияти давомида ҳар қачонгидан ҳам яхшироқ. Анчелотти 2024 йилнинг ёзида тугайдиган шартномаси охиригача "қаймоқранглилар" жамоасида ишлаш ниятида.

Бундан ташқари, нашр Зиданнинг ўзи ҳам "Реал" билан алоқа ўрнатмаганини ёзмоқда. Франциялик мураббийлик фаолиятини давом эттиришнинг мумкин бўлган вариантлари орасида ПСЖ ва "Ювентус" бор.