Zoran Marushich: "Xudo xohlasa, muxlislarimizga Osiyo Chempionlar Ligasi yo‘llanmasini tortiq etamiz, muxlislarimiz bunga loyiq"

O‘zbekiston Superligasi 22-turidan o‘rin olgan "Neftchi" - "Navbahor" (1:2) uchrashuvidan so‘ng namanganliklar matbuot xizmati jamoaning ikkinchi goli muallifi Zoran Marushich bilan intervyu uyushtirdi:

"Avvalo “Neftchi”ga qarshi kechgan bahs borasida to‘xtaladigan bo‘lsam, o‘yin o‘z nomi, ya’ni, “vodiy derbisi”ga xos ravishda shiddatli hamda keskin kurashlar ostida kechdi. Albatta, mezbonlar ham o‘z maydonida, minglab muxlislari ko‘z o‘ngida, bundan tashqari, qayta rekonstruktsiya qilingan stadionning ochilish marosimida ijobiy natija qayd etish maqsadida, maydonga tushgandi va buning isboti o‘laroq, ilk standart vaziyatdan keyinoq hisobni ochishga muvaffaq bo‘ldi. Mazkur o‘yinga noqulay ob-havo sharoitiga qaramay, Namangandan ham “Navbahor”ni qo‘llab-quvvatlash niyatida ko‘p minglab muxlislar tashrif buyurgandi.

Bundan tashqari, o‘zingizga ma’lum, jamoamiz joriy mavsumda o‘z oldiga yuksak maqsadlar qo‘ygan. Ushbu omillarni hisobga oladigan bo‘lsak, uchrashuvning bunday tus olishi bizni qoniqtirmasdi. Natijada o‘tkazib yuborilgan to‘pdan so‘ng hujumkorlikni kuchaytirgan holda, Jamshid Iskanderovning ajoyib tarzda amalga oshirgan jarima zarbasidan keyin hisobni tenglashtirib, tanaffusga 1:1 hisobidagi durang natija bilan chiqib ketdik. 

Uchrashuvning 2-bo‘limida ham hujumkorlikni susaytirmagan, to‘pni ko‘proq nazorat qilgan holda o‘ynab, yakunda g‘alaba qozonib, muxlislarni xursand qilishga muyassar bo‘ldik. 

“Neftchi”ga urgan golim joriy mavsumda O‘zbekiston Cuperligasida raqiblar darvozasiga kiritgan 8-to‘pim edi. Ushbu gol esa jamoamizning O‘zbekiston milliy chempionatlaridagi 1450-goli ekanligi, mazkur gol muallifi sifatida “Navbahor” tarixidan o‘rin olganimdan xursandman.

O‘zingizga ma’lum, jamoamiz ayni paytda ikkita frontda kurash olib boryapti va bu kurash oxirigacha davom etadi degan umiddaman.

Xudo xohlasa, muxlislarimizga Osiyo Chempionlar Ligasi yo‘llanmasini tortiq etamiz. Zero, “Navbahor” ishqibozlari bunga loyiqlar.

Nafaqat, O‘zbekiston, balki, MDH va Osiyo mamlakatlarida o‘z nomi hamda obro‘siga, ajoyib muxlislarga ega bo‘lgan jamoada o‘ynayotganimdan juda xursandman. 

Joriy mavsum yakuniga qadar hisobimdagi gollar sonini yanada oshirish, jamoamizning zafarlariga munosib hissamni qo‘shish niyatidaman.

Shuningdek, gollar urishimda menga madad berayotgan jamoadoshlarimga ham o‘z minnatdorchiligimni bildirmoqchiman. Ular bilan joriy mavsum yakunida O‘zbekiston kubogi va chempionlik unvonini birgalikda qo‘lga kiritish nasib etadi degan umiddaman". 

“Navbahor” klubi matbuot xizmati