Arne Slot hech qachon bunaqa sharmanda bo‘lmagan

Angliyaning amaldagi chempioni “Liverpul”da ham inqiroz boshlangan ko‘rinadi. “Qizillar" Premer-liganing ettinchi turida Londonda “Chelsi” mehmoni bo‘lib, murosasiz o‘tgan bahsda raqibga 1:2 hisobida yutqazib qo‘ydi.

BBC jurnalistlarining yozishicha, bu natija liverpulliklar bosh murabbiyi Arne Slot uchun antirekord sifatida qayd etiladigan bo‘ldi.

45 yoshli mutaxassis murabbiylik faoliyatida ilk bor ketma-ket uchta uchrashuvda mag‘lubiyat alamini totib ko‘rdi. Bu uning faoliyatidagi eng yomon seriya hisoblanadi.

Arne Slot shogirlari “Chelsi”dan avval ichki chempionatda “Kristal Pelas”ga ham 1:2, Evropa Chempionlar ligasi umumiy bosqich ikkinchi turida “Galatasaroy”ga 0:1 hisobida yutqazib qo‘ygandi.

E’tiborli jihati shundaki, “Liverpul” ketma-ket uch marotaba engilgan o‘yinlarning barchasi raqib maydonida bo‘lib o‘tgan.

Arne Slot “Liverpul”ga kelgunga qadar Gollandiya chempionatlarida “AZ Alkmaar” hamda “Feyenoord” kabi etakchi jamoalarda bosh murabbiy bo‘lib ishlagan.