Azar: "APL jismoniyroq, La Liga esa texnik jihatdan kuchli"

Belgiya milliy jamoasining sobiq futbolchisi Eden Azar Angliya va Ispaniya chempionatlari oʻrtasidagi farq haqida fikr bildirdi.

Azar faoliyati davomida "Chelsi" safida Premier-ligada, shuningdek "Real Madrid" tarkibida La Ligada toʻp tepgan.

"APL va La Liga? Ularning oʻyin uslubi turlicha. Premier-liga jismoniy jihatdan ogʻirroq — sen hech qachon yugurishni toʻxtatmaysan. La Liga esa texnik jihatdan kuchliroq. “Real”da sen oʻyinni nazorat qilishing mumkin, ammo Premier-ligada bunday imkoniyat yoʻq — sen 90 daqiqa davomida toʻliq tezlikda oʻynashing kerak", — dedi Azar "The Guardian" nashriga bergan intervyusida.

Eden Azar 32 yoshida faoliyatini yakunladi. U “Real”dagi omadsiz davrdan soʻng futbol bilan xayrlashdi. Belgiyalik futbolchi eng yaxshi oʻyinini aynan “Chelsi” safida namoyish etgan.