"Barselona" futbolchisining kelajagi noma’lum. O‘yinchi APLga yo‘l olishi mumkin

Daniyalik himoyachi Andreas Kristensenning "Barselona"dagi kelajagi masalasida hozircha aniq qaror yo‘q. Futbolchining kataloniyaliklar bilan amaldagi shartnomasi mavsum oxirigacha mo‘ljallangan.

Qoidalarga ko‘ra, ikki haftadan so‘ng Kristensen xorijiy klublar bilan erkin muzokara olib borishi va hatto dastlabki shartnoma imzolashi mumkin bo‘ladi — bunga FIFA reglamenti ruxsat beradi.

"AS" nashrining xabariga ko‘ra, "Barselona" Kristensenning professionalligini yuqori baholaydi, ammo hozircha unga yangi shartnoma taklif qilishga shoshilmayapti. Kataloniya klubining bu passiv pozitsiyasi boshqa jamoalar uchun imkoniyat yaratmoqda.

Xususan, Kristensen Angliyaga qaytishi mumkin — 29 yoshli himoyachini "Nyukasl" anchadan beri kuzatib kelmoqda. Shuningdek, manba ta’kidlashicha, Saudiya Arabistonining moliyaviy imkoniyati yuqori bo‘lgan klublari ham uni o‘z safiga qo‘shib olishga urinishi mumkin.