"Biz buni eplay olamiz, qurbimiz ham etadi" - "Nasaf"ga supergol urgan Sardor yana bu ishini takrorlamoqchi!
28 iyul kuni Andijonda katta futbol bayrami. Shu kecha “Andijon” klubi ikkinchi davraning dastlabki uchrashuvida “Nasaf”ni “Bobur Arena”da qabul qiladi. Nihoyat, andijonliklar jonajon uyiga qaytishdi.
Yodingizda bo‘lsa, mavsumning ilk turida “Andijon” “Nasaf”ning maydonida Sardor Abdunabievning supergoli evaziga muhim uch ochkoni qo‘lga kiritib qaytishgandi. Bu safar ham Abdunabiev va uning jamoasi g‘alaba ishtiyoqida jiddiy tayyorlanishmoqda. Bo‘lajak bahs oldidan aynan o‘z goli bilan “Nasaf”ni tiz cho‘ktirgan Sardorga o‘zimizni qiziqtirgan savollar bilan murojaat qildik.
- Ikkinchi davra boshlanish arafasida. “Andijon” esa “Nasaf”ga qarshi astoydil tayyorgarlik ko‘ryapti. Bo‘lajak o‘yin oldidan nimalarni ayta olasiz?
- Bu o‘yinga barchamiz jiddiy tayyorlanyapmiz. Bilasiz, chempionatning 1-turida safarda “Nasaf”ni yutib kelganmiz. Ikkinchi davrani ham g‘alaba bilan boshlamoqchimiz. Biz shunchaki o‘ynamaymiz. O‘z kuchimizni namoyish qilib, muxlislarimizni xursand qilgan holda yutmoqchimiz. O‘zimizning maydonimizda ochilish marosimi ham bo‘ladi. Bo‘lajak uchrashuv qanday bo‘lishini o‘ylab, hozirdan yaxshi his qilyapmiz. “Andijon” muxlislarini hamma biladi. Stadionda muhit umuman boshqacha bo‘ladi. Shunga yarasha biz ham qattiq tayyorgarlik ko‘ryapmiz, maqsadimiz faqat g‘alaba! Albatta, buni eplay olamiz va qurbimiz ham etadi.
- “Nasaf”ning hozirgacha yagona mag‘lubiyati “Andijon” bilan uchrashuvda sodir bo‘lgan va sizning urgan chiroyli golingiz o‘yin taqdirini hal qilgan. O‘sha uchrashuvni tez-tez eslab turasizmi yoki...
- Albatta, men uchun hali hammasi oldinda. Yana bunday chiroyli gollarni urishim kerak. Bu bilan to‘xtab qolmoqchi emasman. Ha, o‘shanda yaxshi gol bo‘lgan. Ammo gol chiroyli yoki oddiy holatda kiritilmasin muhimi, jamoamizga g‘alaba keltirsa bo‘lgani. Bu biz uchun katta sharaf bo‘ladi.
- Oldinda yana “Nasaf” bilan o‘yin kutib turibdi. Faraz qiling, sizga yana chiroyli gol urish imkoniyati taqdim etilyapti va bu o‘yin taqdirini hal qiladiyu, ammo mavsum oxirigacha boshqa gol ura olmasangiz, bunga rozi bo‘larmidingiz?
- Yo‘q. “Nasaf”ga gol urib, bu yog‘iga gol urmaslik to‘g‘ri kelmaydi. “Nasaf”ga ham, boshqa jamoaga ham gol urib “Andijon”ning g‘alabasiga o‘z hissamni qo‘shsam bo‘lgani. Men uchun muhimi shu. Menga chiroyli emas, balki g‘alaba goli bo‘lsa etarli. Bu orqali jamoadoshlarimiz bilan xursandchilik qilsak, bu juda ajoyib bo‘ladi.
- Demak, yana “Nasaf”ga gol urish niyatingiz bor...
- Albatta, gol urish niyatim bor. Bu uchrashuvda g‘alabadan boshqa narsani o‘ylamayapmiz. Bundan boshqa ilojimiz ham yo‘q. Muxlislarimiz ham shuni talab qilishadi. Shunga yarasha tayyorgarlik ko‘ryapmiz.
- Nihoyat, “Andijon” “Bobur Arena”ga qaytyapti. Tabiiyki, o‘sha kuni muhit betakror darajada bo‘ladi. Shularni o‘ylaganingizda nimalarni his qilyapsiz?
- Albatta, ishqibozlarimiz biz uchun shunday muhit yaratishyapti va biz ham qarab turmaymiz. Shunga loyiq darajada o‘yin ko‘rsatishimiz kerak. G‘alabamiz bilan stadiondagi muhitni yanada bezatib berishimiz kerak.
- Jamoaning yozgi tayyorgarligi haqida ham to‘xtalib o‘tsangiz.
- Hammasi reja bo‘yicha yaxshi bo‘ldi. Tojikistonda yig‘in o‘tkazdik. Yaxshi raqiblarga qarshi o‘ynadik. O‘z o‘yinimizni kuchaytirib, yanada jangovar o‘yin ko‘rsatishga harakat qilamiz.
Shuhratbek Jo‘raev.
Fikrlar