"Bunyodkor" yangi futbolchilar bilan shartnoma tuzishda davom etmoqda

Yangi mavsumga tayyorgarlikni davom ettirayotgan “Bunyodkor” tarkibini kuchaytirishda davom etadi.

Klub matbuot xizmatining tarqatgan xabariga ko‘ra, kuni kecha yana bir qator futbolchilar bilan shartnoma imzolandi. Xususan, faoliyatining aksar qismini Jizzaxning “So‘g‘diyona” jamoasi safida o‘tkazgan tajribali yarim himoyachi Sanjar Rashidov endi “qaldirg‘och”ga aylandi.

Farg‘ona viloyati “Hokim Kubogi” musobaqasida o‘zining ishonchli o‘yinlari bilan e’tiborga tushgan qirg‘izistonlik yarim himoyachi Odiljon Abdurahmonov ham “Bunyodkor” a’zosi bo‘ldi. O‘tgan mavsumni jamoa safida o‘tkazgan tojikistonlik markaziy himoyachi Davronjon Ergashev 2021 yilda ham “Bunyodkor” libosida to‘p suradi.

Shuningdek, klub akademiyasi tarbiyalanuvchilarini o‘rinbosarlar safiga qo‘shilish an’anasi ham davom etadi. O‘tgan mavsum Toshkent shahar birinchiligida qatnashgan Murod Otajonov va Ivan Boshkovich murabbiyligidagi “Bunyodkor” jamoalari safida to‘p surgan Ulug‘bek Raimov hamda Sudaysiy Jo‘raboev 2021 yil Abduhamid Qodirov boshchiligidagi o‘rinbosarlar tarkibida o‘ynaydi. Yana bir tarbiyalanuvchi - Islom Karimov esa, “Bunyodkor-2” bilan 1-ligada ishtirok etadi.

MA’LUMOT UChUN

SANJAR RAShIDOV

Tug‘ilgan sanasi: 14.07.1993 yil

Tug‘ilgan joyi: Jizzax shahri

Ampluasi: yarim himoyachi

FAOLIYaTI

2013-2017 yillar “So‘g‘diyona”

2018 yil “Nasaf”

2019-2020 yillar “So‘g‘diyona”

DAVRONJON ERGAShEV

Tug‘ilgan sanasi: 19.03.1988 yil

Tug‘ilgan joyi: Tojikiston, So‘g‘d viloyati

Ampluasi: markaziy himoyachi

FAOLIYaTI

2009 yil “Regar Tadaz” (Tojikiston)

2010-2012 yillar “Istiqlol” (Tojikiston)

2013 yil “Jetisu” (Qozog‘iston)

2014 yil “Gabala” (Ozarbayjon)

2014-2015 yillar “Jetisu” (Qozog‘iston)

2016-2017 yillar “Taraz” (Qozog‘iston)

2018 yil “Istiqlol” (Tojikiston)

2019 yil “Xo‘jand” (Tojikiston)

2020 yildan “Bunyodkor”

2008 yildan beri Tojikiston milliy terma jamoasi a’zosi

ODILJON ABDURAHMONOV

Tug‘ilgan sanasi: 18.03.1996 yil

Tug‘ilgan joyi: Qirg‘iziston, Qizilqiya shahri

Ampluasi: yarim himoyachi

FAOLIYaTI

2014 yil “Aldier” (Qirg‘iziston)

2015-2020 yillar “Alay” (Qirg‘iziston)

2016 yildan Qirg‘iziston milliy terma jamoasi a’zosi